Valparaíso, una vila portuària e toristica al centre de Chile de tres cents mila abitants, es afectada dempuèi dissabte per un incendi immens qu’a fach almens setze mòrts. Lo fuòc, que contunha de cremar sens contraròtle, a ja afectat cinc cents ostals de dotze quartièrs e a obligat d’evacuar dètz mila personas d’aquela vila declarada patrimòni de l’umanitat per l’UNÈSCO.
 
La presidenta chilena, Michelle Bachelet, a ja signat un decret que declara l’estat d’excepcion e de zòna catastrofica a Valparaíso.
 
Tot comencèt amb un fuòc de selva vèrs un camin, a un endrech nomenat La Pólvora, mas lo fòrt vent que lai bufava faguèt que las flamas s’espandiguèssen plan lèu dins los airals poblats coma La Cruz, El Vergel, San Roque, Las Cañas e Mariposas.
 
Malgrat que lo fuòc, sens precedents a Chile, avance pels districtes periferics de la vila, fòrça abitants dels quartièrs mai centrals son demorats sens electricitat ni aiga.