Lo departament de Var, al centre-sud de Provença, a anonciat un refortiment dels contraròtles sus las estradas amb la consigna de “tolerància zèro”, segon çò que raportava diluns passat Le Figaro.
 
Aquela mesura la decidiguèt lo prefècte del departament en seguida d’una crescuda de 34% del nombre d’accidents estradièrs dins lo país. Dempuèi lo 1r de genièr, 229 accidents corporals se son enregistrats, del temps que l’an passat dins aquelas datas se n’enregistrèt 171. La chifra de personas mòrtas creis de 57% amb 22 tuats contra 14 arunan, e la dels ferits es de 272 contra los 214 de l’an passat.
 
“Qu’avèm fach fòrça prevencion, avèm fòrça rapelat ai personas la necessitat de respectar lei velocitats, de pas beure au volant…” çò declarava Laurent Cayrel, actual prefècte del departament provençal. “Es un moment que i cau passar de l’estadi de l’informacion a l’estadi de la repression”, çò apondèt.
 
Lo fach que la majoritat dels accidents s’aprengan pas a l’alcolemia mas a d’excès de velocitat e d’inatencion al volant, a fach metre l’accent suls contraròtles de velocitat.
 
Coma ben remarca Le Figaro, las vacanças de Pascas son ja començadas pels parisencs, e aquesta setmana ne vendràn un fum en automobila en Occitània coma toristas.
 
Al delà dels contraròtles, Cayrel anoncièt tanben de politicas de prevencion e la multiplicacion dels estagis d’alternativa a las mesuras penalas, per sensibilizar los contravenents als risques de l’estrada. “Esperam un cambiament de comportament sus l’estrada”.