Caminavi per carrieras, dins ma vilòta de Provença, quora aquela aficha m’arrestèt sus lo còup. E v-òc, vos expliqui. De que veguèri?
 
De camiás d’estil provençau, de colors caudas e estivalas, de sorires amistós, un títol jaune sus fons roge: “mistral”, lo vent... o “Mistral”? L’autor Frederic Mistral: lo Prèmi Nobel de Literatura, per lo centenari de sa mòrt en 2014, un filme francés suspresa?... A, non. Èra “mistral” amb una m minuscula.
 
Pasmens per ieu mi semblèt d’èstre un “filme occitan subliminau”.
 
Vaicí lo resumit que trobèri dau filme. Léa, Adrien e son pichon fraire Théo, sord de naissença, parton en vacanças en Provença en cò dau pairegrand Pau “Oliveron” (un nom que sòna occitan e fa pensar a olivier + ‑on, pichon). Lo rescontrèron jamai a causa d’una garrolha familiala. Lei vacanças començan mau, que la velha dei vacanças, lo paire li aviá anonciat que quitava l’ostau. E lo rescòntre amb lo pairegrand es pas verament aqueu qu’esperavan. L’acipada dei generacions es granda entre aqueleis ados e aqueu paigrand que li sembla psicorigid. A tòrt. Perque lo passat bolegaire de Pau va tornar sorgir e leis annadas setanta van desbarcar au fin fons deis Aupilhas. Dins aquest estiu, lei doi generacions van èstre transformadas l’una per l’autra.
 
Aquela comèdia dramatica es sortida en salas en Occitània de França despuei lo 2 d’abriu de 2014 e es d’una durada d’1 ora 45 minutas. Foguèt realizada per Rose Bosch, amb leis actors principaus Jean Reno, Anna Galiena, Chloé Jouannet. Lo filme foguèt rodat a la fin de mai de 2013 ai Paluns de Nòvas e dins leis Aupilhas.
 
Ai pas lo temps d’anar au cinèma d’aquesta passa. Es pecat, perque per parlar d’un filme es mielhs de l’aguer vist. Alora espèri qu’un lector de Jornalet nos dirà s’es un filme bèu o un filme provincialista de mai.
 
De mai, m’interessariá de saupre coma foguèron tractats lei tèmas que mi venon en tèsta en tornar pensar a aquela aficha: la question dau retorn a la tèrra, ai liames familiaus e sociaus per leis urbans dins “lo Sud”, la plaça de la lenga occitana provençala o alora de l’accent, leis estereotipes o non, etc. Jornalet, un mèdia participatiu? Bota, anem veire lei reaccions!
 
 
 
 
Aigulf Bargemon