Lo govèrn italian a presentat un projècte per recentralizar de competéncias pertanhent a las regions amb estatut ordinari, es a dire, las que non son autonòmas. Aquela lei vòl qu’una seguida de competéncias, qu’a l’ora d’ara son partejadas entre l’estat central e las regions, sián de competéncias exclusivas de Roma. Valent a dire, una recentralizacion. Dins aquelas competéncias i a la coordinacion de las finanças publicas, las universitats, de nòrmas sus la santat o lo trabalh e lo comèrci amb l’estrange.
 
Las cinc regions autonòmas, la Val d’Aosta, Trentin-Sud Tiròl, Friol-Venècia Júlia, Sicília e Sardenha, son en alèrta. An paur qu’aquela nòva lei lor pòsca retalhar l’autogovèrn, o ne considerar la possibilitat. Lo president de Friol-Venècia Júlia, Franco Iacop, s’es acordat amb la region de Trentin-Sud Tiròl per demandar una “clausula de salvagàrdia” dels estatuts d’autonomia dins aquela lei, qu’empedisca quina pèrda de competéncias que siá.
 
Lo Conselh de la Val d’Aosta demanda çò meteis e, en mai d’aquò, remembra que las ressorsas economicas de cada territòri devon prene en compte las foncions de las regions autonòmas.
 
Per paur de la recentralizacion, qualques regions amb l’estatut ordinari an demandat d’èsser reconegudas coma autonomias especialas. Un dels cases mai clars es Venèt, que son president, Luca Zaia, a demandat que siá la seisena autonomia especiala d’Itàlia, mas qu’a pas obtengut cap de resultat. Pasmens, dins dos meses, lo conselh de Venèt decidirà se convòca un referendum sus l’autonomia especiala o ben un sus l’independéncia.
 
D’autras regions coma Lombardia demandan tanben un estatut especial. Lo president lombard, Roberto Maroni, disiá que voliá far tanben un referendum sus l’estatut especial. Dins aquel sens Maroni vòl que Lombardia gerisca 100% de las taxas que se recobran al país.
 
 
 
 
_____
Nationalia: Itàlia prepara una reforma constitucional, les autonomies especials es posen en alerta