Divendres passat condemnèron un jove de 21 ans a dos ans de preson, dont catòrze meses amb sosta, per una agression en abril de 2013 contra un bar gai de Bordèu, dins l’encastre de las manifestacions omofòbas contra lo maridatge per totes.
 
L’agression se passèt dins la nuèch del 17 al 18 d’abril d’arunan, quand dos individús, amb la cara dissimulada, intrèron dins un bar gai del centre de Bordèu en brisant de botelhas e de veires, en mostrant un pistolet de bilha e en ferissent lo gerent e una clienta a còps de cròça.
 
Coma o explican dins Libération, Jacques Godefroy, principala victima de l’agression e present al procès, qualifiquèt la condemnacion de “satisfasenta segon lo son vejaire”, e mai s’aviá solament “un aspècte simbolic”. Godefroy declarèt a l’AFP que l’agressor èra “un joen que cometèc ua error”, e planguèt las excusas que l’agressor formulèt d’un biais “subliminau”. De son costat, l’avocat del condemnat faguèt pas cap de declaracion sus una eventuala apelacion.
 
Aquela agression veniá en seguida de l’èrsa de manifestacions omofòbas del movement contra lo maridatge per totes, dont doas manifestacions s’èran tengudas aquel ser a Bordèu. Aquel movement omofòb èra menat per l’umorista arpitana Frigide Barjot, coneguda per sos engatjaments religioses e omofòbs. Barjot demandèt alavetz al ministre francés de l’interior, qu’èra Manuel Valls, d’accions preventivas contra los “gropusculs identitaris”, que normalament manifestavan amb son movement contra lo maridatge per totes. Aital, lo movement contra lo maridatge per totes, que faguèt fòrça rambalh dins l’estat francés, ensagèt de s’escartar dels grèus atacs violents que patiguèron dins aqueles meses d’endreches e de collectius omosexuals o de partisans del maridatge per totes.