Aperaquí dètz mila personas manifestèron dissabte passat a Nantas en favor d’una vièlha revendicacion del movement bretonista: l’integracion del departament del Léger Atlantic a la region de Bretanha. Los collectius Bretanha Unida e 44 = Breizh cridèron a manifestar, en aprofechant l’interès del president francés, François Hollande, e de son nòu primièr ministre, Manuel Valls, de reorganizar l’administracion de l’estat e de reduire lo nombre de regions.
 
La manifestacion comencèt a 14h30 dins la Plaça de Bretanha de Nantas, la capitala istorica del país, e marchèt jol lèma “Ni statu quo ni Grand Oèst”. Se voliá metre en evidéncia davant Hollande que la volontat dels bretons, tocant una reorganizacion territoriala de l’estat, deu inclure dins la region de Bretanha lo departament del Léger Atlantic, amb la capitala a Nantas. Los manifestants tanben diguèron qu’en cap de cas acceptarián pas lo mantenement de la division actuala, ni tanpauc aquela que prevei la fusion de las regions de Bretanha, dels Païses de Léger e de Peitau-Charantas dins una macroregion del Grand Oèst.
 
En 2008, aperaquí dètz mila personas participèron a una autra manifestacion, tanben a Nantas, amb la meteissa revendicacion. 



_____