Uèi comença la primièra edicion del Festenal Internacional de Poesia de Recife, que fins a dimenge vòl "integrar lo circuit de festenals internacionals de poesia qu'existisson en America del Sud e Euròpa", segon Wellington de Melo, escrivan e coordenaire de literatura al Secretariat de la Cultura de Pernambuco.

L'escrivana occitana Aurèlia Lassaque representa Occitània al Festenal. E mai se la jove poèta occitana es pas gaire coneguda en Brasil, la siá preséncia a tirat l'atencion e la curiositat del public e de la premsa locala. Lassaque participarà a una jam poetica amb lo musician João Menelau, e mai a una taula redonda amb lo doctorand en literatura occitana Márcio de Oliveira e lo musician e poèta Silvério Pessoa; aquel es conegut en Euròpa per las siás collaboracions amb d'autres artistas occitans, mai que mai amb La Talvera.
 
Demest los convidats internacionals, que i a de noms coma Ron Whitehead, Carlos Nejar, Luís Serguilha, Ernesto de Melo e Castro, Ricardo Domeneck, Mauro Lo Coco, etc.
 
Lo festenal es organizat pel Secretariat de la Cultura de Pernambuco e la Fondacion del Patrimòni Istoric e Artistic de Pernambuco (Fundarpe).  Al programa i aurà de corses, de taulas redondas, de performanças, d'ajustas poeticas, de declamacions… dins lo polit encastre de la tor Malakoff, un ancian observatòri astronomic bastit al centre de Recife pendent lo sègle XVII.
 
Recife es la  capitala de l'estat de Pernambuco dins la còsta nòrd-èst de Brasil. S'agís d'una vila celèbra per la siá tradicion poetica. I son nascuts qualques unes dels mai grands escrivans brasilièrs: Manuel Bandeira, Carlos Pena Filho, Joaquim Cardozo, João Cabral de Melo Neto… Dins aquel contèxt, que Recife i vòl integrar lo circuit internacional de festenals literaris en se dedicar a la poesia, aquel genre literari que va totjorn amb l'indústria culturala e que s'impausa coma l'art del non-conformisme.