Carlos Barrera, sindic d’Aran, a signat ua convencion d’esponsorizacion damb es esportius professionaus aranesi Álex Puente, Ruben Caseny, Aymar Navarro e Tòn Cónsul, entà promòir era destinacion toristica esportiua dera Val d’Aran peth Mond, representada en imatge e enes valors des corredors, des espòrts que practiquen e des esquipes que ne hèn partida, mejançant era esponsorizacion institucionau.
 
Damb aguesta convencion, es esportius aranesi seràn abilhats, enes desplaçaments e enes estagis, enes esquipaments e enes ròbes de descans, damb es logotipes de Foment Torisme Val d’Aran (“Val d’Aran, era esséncia des Pirèneus”) e deth Conselh Generau d’Aran, ath delà de portar-les ena ròba de competicion, cada viatge qu’era nòrma e eth reglament des esquipes ac permeten.
 
Enes conferéncies de premsa, eveniments jornalistics o esportius mediatics, portaràn eth logotipe “Val d’Aran, era esséncia des Pirèneus” e deth Conselh Generau d’Aran. Tanplan es veïculs qu’utilizen es esportius entàs desplaçaments e assisténcies as competicions auràn de portar eth madeish logotipe.
 
Tanben distribuiràn publicitat oficiau, creada per Foment Torisme Val d’Aran, dera destinacion toristica e esportiua dera Val d’Aran enes concentracions, competicions e eveniments esportius o sociaus restacadi damb es esquipes.
 
Álex Puente ei esquiaire professionau FIS (categoria internacionau), corredor olimpic d’esquí aupin (Sochi 2014) e membre dera esquipa Steffen-S1, çò que li permet de participar en espròves nacionaus e internacionaus de prumèr nivèu peth Mond.
 
“Ei ua ajuda fòrça importanta, a mès d’un aunor de representar eth mèn país, Aran, a on i vaja a competir”, çò soslinhèc Puente que higèc qu’“era participacion en es Jòcs Olimpics de Sochi a estat ua experiéncia inoblidabla, mès encara me queden fòrça rèptes de complir coma ei eth mondiau junior.”
 
Ruben Caseny ei ciclista damb licéncia e corredor d’esquí nordic professionau, membre dera esquipa UCI Start-Trigon Cycling de categoria Continental UCI e dera esquipa Vitaldent-Aran, çò que li permet de participar en espròves nacionaus e internacionaus de prumèr nivèu peth Mond, tant de ciclisme coma d’esquí nordic.
 
“Ei ua grana motivacion que t’ajuden entà tirar entà deuant, pr’amor que tot some. Me senti fòrça orgulhós qu’eth mèn país me dongue supòrt e ath madeish viatge poder representar-lo”, çò manifestèc Caseny pendent era signatura.
 
Aymar Navarro ei esquiaire professionau “freeride” de categoria internacionau World Freeride Tour (WFT/WFQ), çò que li permet tanben participar en espròves nacionaus e internacionaus de prumèr nivèu peth Mond. Navarro soslinhèc qu’“era Val d’Aran ei un paradís entà practicar quinsevolh espòrt, mès en especiau entàs practicants coma jo, deth «freeride» non te l’acabes”.
 
Ath delà, Navarro ahigèc qu’“ei un orgulh representar ara Val d’Aran e, qué melhor que representar e que t’ajuden?”
 
Tòn Cónsul ei patinaire professionau junior ISU e membre der FCB, çò que li permet de participar en espròves nacionaus e internacionaus de prumèr nivèu peth Mond, de patinatge artistic sus gèu.
 
En paraules de Tòn, “representar ath mèn petit país, era Val d’Aran, ei tot un orgulh entà jo, açò encara te da mès fòrces entà contunhar lutant.”
 
De son costat, eth sindic d’Aran, Carlos Barrera, soslinhèc que “qui melhor qu’es nòsti joeni esportistes professionaus aranesi entà representar eth nòste país e eth sentiment d’identitat? Eth govèrn aranés vò ajudar eth sòn esfòrç entà obtier mès e melhors resultats.”
 
En paraules dera conselhèra deth torisme d’Aran, Anna Díaz, “Foment Torisme Val d’Aran facilitarà as esponsorizadi eth materiau publicitari consistent en originaus deth logotipe «Val d’Aran, era esséncia des Pirèneus» en diferentes lengües e deth Conselh Generau d’Aran, atau coma materiau publicitari, diptics, triptics, revistes, etcetèra” e higèc qu’“ena Val d’Aran eth torisme e er espòrt van dera man e ei un orgulh qu’es nòsti esportistes ath delà de competir en mès naut nivèu poguen dar a conéisher era nòsta destinacion toristica”.
 
Eth Conselh Generau d’Aran pagarà, en concèpte d’esponsorizacion, era quantitat de 3000 èuros a cadun des quate esportistes aranesi.
 
 
 
 
Conselh Generau d’Aran