Actualitats
Portugal se remembra dels 40 ans de la Revolucion de las Girofladas
Uèi fa 40 ans qu’en Portugal se debanèt la Revolucion de las Girofladas, que desquilhèt la dictatura de Salazar e que marquèt tanben la fin del colonialisme portugués. Portugal festeja uèi aquel anniversari amb fòrça nostalgia, en tot esperar que se passe quicòm que tire lo país del declivi actual. Las valors d’aquela revolucion que uèi se’n remembran, las considèran traïdas e cridan a lor restitucion.
Fa 40 ans, una revolucion militara guidèt “un crit de libertat e de dignitat d’un pòble que vencèt la paur de la repression dels darrièrs 48 ans. Totòm sortiguèt per carrièras per reconquistar los dreches e las libertats e transformar Portugal”, çò declarava fa qualques jorns a La Voz de Galicia Otelo Saraiva de Carvalho, l’estratèg d’aquel còp militar que menèt la revolucion. Los protagonistas del dich Jorn de la Libertat planhon que las valors d’aquel jorn de fa 40 ans se sián desmembradas.
Pasmens, e mai se l’indignacion es majoritària, la celebracion de uèi serà solament d’actes de memòria e de revendicacion.
Après legir d’opinions dins qualques mèdias portugueses, podèm preveire que uèi, lo pòble portugués, indignat per sa situacion davant la tròica europèa, clamarà pel retorn de la dignitat perduda e de las valors d’aquela revolucion. Aquelas valors, e mai s’escriguèron la primièra linha de la Constitucion actuala de Portugal, se remarcan pas gaire dins la vida vidanta.
Lo 24 d’abril de 1974, a 11 oras del ser, la ràdio Emissores Associados de Lisbona emetiá la cançon E depois do Adeus. Èra lo primièr senhal que tot èra prèst. Los oficials del Movement de las Fòrças Armadas (MFA) anèron al luòc de comandament. A 4 oras del matin del 25 d’abril, la ràdio emetiá la cançon Grândola Vila Morena. Èra lo senhal qu’avián causit Saraiva de Carvalho e los capitanis per far lo còp d’estat, que vendriá tota una revolucion pacifica. Los militars portugueses èran la basa d’una dictatura de 48 ans basada sustot sus la mantenença de las colònias, e eles meteisses la reversèron.
| fffff | fffff | |
| Totas las versions de Grândola Vila Morena L’imne creat per Zeca Afonso e serviguèt de senhal per començar la Revolucion de las Girofladas. La cançon rend omenatge a Grândola, una vila tradicionalament revolucionària, e remarca qu’“es lo pòble que comanda”. Long dels ans, l’imne es estat cantat e enregistrat per un fum de musicians. Vaicí una seleccion de las versions mai conegudas e mai significativas. 1. La version originala José Zeca Afonso, un dels mai grands cantaires portugueses de l’istòria, enregistrèt Grândola Vila Morena al començament dels ans 1970 quand lo regim de Salazar enebissiá que las siás cançons foguèsson emesas per la ràdio. La cantèt per lo primièr còp dins un concèrt a Compostèla (Galícia) en 1972. Los militars del Movement de las Fòrças Armadas decidiguèron qu’aquesta cançon seriá lo senhal per que l’armada prenguèsse las carrièras, per fin de n’acabar amb la dictatura, tre que seriá emesa per Ràdio Renaissença. 2. Lo filme Lo filme Capitanis d’Abril reprodusís lo moment que se visquèt dins las casèrnas quand sonèt l’imne de Zeca Afonso, la matinada del 25 d’abril de 1974. 3. L’adieu de Zeca Fòrça malaut ja, José Zeca Afonso, que moririá en 1987, faguèt un darrièr concèrt al Colisèu de Lisbona. De cantaires e de grops musicals de tot lo país anèron rendre omenatge a un òme qu’èra tot un simbòl d’onestetat e de lucha per la democracia. Quand Zeca acabèt lo concèrt en cantant aquesta cançon, se dobriguèt las pòrtas que i aviá darrièr la scèna e fòrça musicians jonguèron lo public dins una version esmoventa de l’imne. 4. La version d’Amália Rodrigues Amália Rodrigues enregistrèt aquesta version solemna de Grândola Vila Morena lo meteis an de la Revolucion de las Girofladas, en 1974. Zeca Afonso diguèt en public que li agradava pas que Rodrigues, considerada una de las cantairas mai aimadas de la dictatura, cantèsse las siás cançons. 5. L’omenatge de Galícia Zeca Afonso èra fòrça ligat a Galícia e èra un ferme defensor de l’unitat de la lenga galaicoportuguesa. En 2007, la television galèga faguèt un omenatge a Zeca amb un grand concèrt que la fin foguèt una version d’aquesta cançon interpretada per de cantaires galècs e portugueses a l’encòp. 6. L’omenatge de París De cantaires franceses e portugueses faguèron, fa gaire, un omenatge a Zeca Afonso a París. A la fin del concèrt, sonèt la votz del cantaire mentre que lo public parisenc cantava la cançon. 7. La version de Betagarri Lo grop basco Betagarri fa normalament dins los sieus concèrts aquesta version de Grândola Vila Morena. 8. Saramago Lo prèmi Nobel José Saramago èra militant comunista pendent la revolucion e dirigiguèt la brèva estapa revolucionària del jornal Diário de Notícias. Dins aqueste vidèo canta Grândola Vila Morena en cò sieu amb divèrses amics, ont i a lo cantaire espanhòl Luis Pastor. 9. Sara Tavares, dempuèi lo Cap Verd En 2008, la cantaira del Cap Verd Sara Tavares faguèt aquesta version jazz de la cançon. Pendent tota la siá vida, Zeca Afonso foguèt un grand defensor dels movements independentistas de las colònias portuguesas. Que venguèron independentas coma consequéncia de la Revolucion de las Girofladas. 10. La version de Joan Baez La granda cantaira estatsunidenca Joan Baez faguèt tanplan son omenatge a Zeca Afonso e a la Revolucion d’Abril amb aquesta version de Grândola, cantada en un concèrt a Lisbona. 11. Una version malhorquina Los carlamusaires de Petra (Malhòrca) e la Corala de Sant Joan an fach aquesta version de la cançon de Zeca Afonso. 12. Version de 365 Los joves musicians portugueses e brasilièrs reconeisson a l’ora d’ara lo mestratge de José Zeca Afonso coma un dels que los an influit mai. Vaicí la version que fa de l’imne lo grop 365. 13. Chico Buarque incorporèt l’imne a Fado Tropical Lo grand musician brasilièr Chico Buarque incorporèt Grândola Vila Morena al començament de la siá cançon Fado Tropical. 14. Grândola Vila Morena dins las manifestacions contra la tròica europèa Dempuèi l’an passat, dins las manifestacions que i a en Portugal contra la politica d’austeritat de la tròica, son a tocar tornarmai l’imne que desencadenèt la revolucion. Vaicí una manifestacion a Belém en setembre de 2012. 15. Lo primièr ministre portugués Passos Coelho foguèt silenciat dins lo Parlament amb lo cant de Grândola Vila Morena Lo movement contra la tròica en Portugal a adoptat definitivament aquesta cançon dempuèi qu’un grop de manifestants interrompèt un discors del primièr ministre dins lo parlament amb l’imne de Zeca Afonso. Cal remarcar que lo primièr ministre e la presidenta del parlament decidiguèron de se calar e d’escotar l’imne mentre que los ciutadans que cantavan foguèron fòrabandits. Lo primièr ministre diguèt quitament que li semblava qu’aquò èra la melhora manièra que podiá imaginar d’èsser interromput. 16. E en febrièr de 2013 passat a Lisbona Los manifestants cantèron Grândola Vila Morena al Terreiro do Povo de Lisbona, en febrièr d'arunan, dempuèi la granda manifestacion contra las politicas d’austeritat. Lo cant sonèt a l’encòp dins totas las vilas portuguesas. | ||
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
De militars que fan una revolucion per donar lo poder al pòble, i a un autre exemple dins l'Istòria?
Un pòble que daissèt morir dins l'oblit mantun eròi d'aquela gesta, en particular lo Zeca Afonso que sa "Grândola vila morena" es una de las cançons mai bèlas per marcar un "Temps de cerièras".
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari