La seleccion occitana de fotbòl golegèt dimars la seleccion del Sahara Occidental per sièis gòls a dos. Los gòls contra los saharians foguèron de Michael Bertini (2), Nicolas Flourens, Jordan Amiel, Cédric Quere e Jordan Patrac. Pasmens, ièr, dimècres, la nòstra seleccion perdèt contra Curdistan per un gòl a zèro, çò qu'empedís que la seleccion del país nòstre pòsca passar a las semifinalas de la Viva World Cup, lo campionat de fotbòl de las nacions sens Estat que se jòga en Curdistan. La seleccion occitana fa partida del Grop A amb los anfitrions e los saharians. Dins aquel grop, los curds an demostrat una superioritat notabla, pr'amor qu'al delà de véncer Occitània, eliminèron l’esquipa del Sahara Occidental per sièis gòls a zèro, e se son ja qualificats dirèctament per las semifinalas.
En total, nòu seleccions participan a la Viva World Cup, qu'es lo principal campionat de fotbòl del mond de las nacions sens Estat. A l’acte d’inauguracion, i aguèt mai de 10 000 personas dins la vila d’Erbil e las partidas se jògan en tres terrens desparièrs. Lo mai grand, l’estadi Franso Hariri, a una capacitat de 40 000 espectators.
En defòra del terren esportiu, la fraternitat entre las seleccions es plan presenta. Los occitans son lotjats dins la meteissa ostalariá que las seleccions de Darfor, de l’Eelam Tamol, de Zanzibar e del Sahara Occidental, e segon çò qu’a pogut saber Jornalet, l’amistat frairala entre los jogaires es, ara per ara, la caracteristica generala. Aqueste jornal a sauput tanplan que las relacions personalas son mai que mai bonas entre occitans e curds, una dinamica qu'esperam que se mantendrà après la desfacha occitana davant los anfitrions.
Per combatre la fòrta calor del país asiatic, ont s’arriba als 40 gras a quatre oras de l’aprèsdinnar, los jogaires occitans recebon de corses de lenga occitana cada matin. Una sana manièra de fugir la calor e de desmembrar pas que los jogaires occitans son en Curdistan en representacion d’un país.
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#5 Òc, as rason, e mai los Provençaus an un Estat, que's ditz Mónegue! Cal protestar oficialament. E puèi, an pas de faire jogar de gascons dins lor seleccion, eles, mentre que nosautres, si, pauròts que sèm! Es pas de concurréncia desleiala, aquò? Bon, en tot cas, mercés a eles, Occitània es representada a la demifinala. Es ja quicòm. Visca Provença!
Aquela preséncia d'una còla provençala es una vergonha.
E disi aquò en tant que provençau ..
Aquela equipa de keke se'n fot pas mau de la lenga e dau pais ..
Fa d'annadas que l'AOF batalha per faire coneisser Occitània, coma explicar ai gents que Provença es tanben Occitània en aquelas condicions ?
Jo didi:
Vau mès èster temut que planhut
E provençau mès que pro vençut.
RECTIFICACION: Occitània non pòt cap passar a semifinaus.
#1 E ath delà que i a eth risc d'un afrontament Occitània - "Provença" en semifinaus; en cas de non capitar que poderie èster ua catastròfa nacionau
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari