Los agents de l’environament del Conselh General d’Aran ensajan, dempuèi una setmana, de trobar la maire d’un orsalhon que trobèron lo 17 d’abril passat davant la pòrta d’un ostal al vilatge d’Aubèrt. Es lo primièr còp qu’un ors se sarra tant d’un nuclèu abitat per d’umans.
 
L’orsalhon se mòstra completament desorientat, çò que fa mai complicat lo prètzfach dels agents environamentals araneses. De fach, an ensajat qualques còps, en divèrses endreches, de liberar l’orsalhon en montanha per veire s’èra capable de seguir la tralha de sa maire, mas l’animal bolega pas.
 
L’orsalhon es una femèla d’ors brun qu’a solament tres meses. Se’n desconeis l’origina, se mòstra totjorn agressiva e fugís la preséncia umana. Los agents del govèrn d’Aran l’an alimentada e li an mes un transmetedor per la seguir e per ne conéisser la filiacion e l’origina: “Es agents de miei ambient deth Conselh Generau d’Aran haràn un seguiment exaustiu des movements der orsardet entà poder constatar, en cas que se produsisque, eth retrobament damb sa mair”, çò declarèt lo conselhièr de l’agricultura, l’elevatge e l’environament del Conselh General d’Aran.
 
Per contra, lo govèrn aranés refusa de tutelar l’aculhiment de l’animal dins un centre de recuperacion de fauna. “Era massificacion d’orsi en centres de captivitat ei un problèma actuauments en estat espanhòu, a on actuauments i a practicaments un vintenat d’orsi e se cèrque d’auti centres entà replaçar-los”, çò declarèt lo sindic d’Aran, Carlos Barrera.