Un pòrtavotz del grop neonazi grèc Chrysi Avgi (“alba daurada”), Ilias Kasiriadis, agarriguèt ièr, en un debat a la cadena de television Ant1, doas parlamentàrias d'esquèrra. Lo debat naucèt lo ton fins que Kasiriadis lancèt un veire d'aiga a Rena Dourou, en l'apelar "ridicula". Après un moment de silenci, la deputada del partit comunista Liana Kanelli, li lancèt un jornal, e lo politic neonazi la gautegèt.
 
Après l'agression, Kasiriadis foguèt embarrat dins una cambra dels estudis, mas ne sortiguèt en ne trencant la portada e fugiguèt. Lo ministèri public n'a demandat la detencion.
 
Chrysi Avgi atenguèt representacion parlamentària en las darrièras eleccions a la cambra legislativa grèga. La formacion a protagonizat qualques autres incidents, coma quand obliguèron los jornalistas a se levar per saludar l'intrada del sieu president dins una conferéncia de premsa.
 
Al delà, la setmana passada dos deputats de Chrysi Avgi e la filha del cap Nikos Michaloliakos foguèron arrestats, e posteriorament liberats sens cargas, en relacion amb l'agression d’un trabalhador paquistanés a Atenas. Dempuèi l'ascension electorala del partit nazi grèc a las eleccions del 6 de mai, las agressions contra d'immigrants an aumentat notablament en Grècia fins a venir una dinamica abituala.