Dissabte de vèspre, se banhuquejava a Tolosa e l’estadi dels Minims per las mièjas finalas del campionat d’Elèit. Lo public lesinhanés, dels joves de l’escòla de rugbi als ancians, aviá fait lo desplaçament en nombre per sosténer l’esquipa de Corbièras fàcia als Dragonets. Se los Dragonets vesián Bartahau los daissar a una ora de la debuta de la partida per rejónher los Dracs, Lesinhan perdiá d’entrada son pilar Matieu Griffi (rompedura de la peròne). Los Dragonets marcavan pel segonda linha Gossard, mas Calegari replicava per Lesinhan. Scimone profeitava d’una pauma perduda de l’arrièr Stacul per tornar balhar l’avantatge als catalans: 10-6. Abans la pausa, Lesinhan tornava a l’egalitat mercé a doas penalitats de Benausse, que balhava l’avantatge a sas colors a la 47a minuta sus una novèla penalitat. Los Verd e Blanc fasián mòstra de solidaritat per arrestar las atacas catalanas e d’un esperit d’iniciativa ofensiu qu’acabava per pagar amb un ensag de Pulu (58a). A cinc minutas de la fin, Farid Sid, l’ancian alièr de l’USAP, confirmava la victòria corbierenca. Benausse i metiá un punt final amb sa cinquena penalitat de la vesprada just sus la còrna: 26-10. De fait, es una esquipa volontària qu’a pres lo pas sus una formacion un pauc complicada dins son foncionament amb de jogaires que fan anar-venir amb los Dracs o que capitan pas de passar a l’estadi superior. Malaisit d’èsser resèrva dels Dracs!
 
Per la segonda partida, los pronostics èran larjament en favor del Tolosa Olimpic. Mas los jogaires de Vilanuèva refusèron de se faire manjar tot crus e marcavan los primièrs pel centre Decarnin. Los Laupards s’installavan dins los 20 mètres tolzans, e lo fólzer lor tombava dessús: Kheirallah s’escapava sus 90 mètres a la recepcion d’un cop de pè a seguir. Maurèl balhava l’avantatge als tolzans (27a), mas Farid manteniá Vilanuèva a l’auçada abans una segonda realizacion de Maurèl: 18-10 pel TO a la pausa. Decarnin tornava marcar a la 50a: 18-14. Mas Tolosa manteniá los ageneses a distància amb dos novèls ensages: 30-14 al planchòt final.
 
Tolosa es en corsa pel doblat: lo dissabte 10 de mai a Brutus serà lo combat entre la maquina tolzana e l’estrambòrd lesinhanés.
 
Dimenge, los Dracs èran partits fisançoses a Bradford per afrontar los Taures en oiten de la Cup . Aquò comencèt fòrt plan: tres ensages e un 16-0 al cap d’un quart d’ora. Mas Bradford profeitèt de las larguesas defensivas catalanas per puntar a son torn tres ensages e prene l’avantatge a la pausa: 18-16. Dins lo segond temps, Bradford se jogava d’una formacion que capitava pas a tornar trapar l’esperit collectiu de las setmanas passadas. La granda desillusion catalana se marquèt per un 33-20 final al panèl electronic de l’estadi. Leeds a eliminat Saint Helens: 32-12. Widnes es anat batre Salford: 30-20. Wigan, Warrington e Castleford se son aisidament qualificats contra de formacions del Championship que serà representat en quarts de finala (7 e 8 de junh) per las esquipas de Leigh e Keigley.
 
Dissabte, retorn al Campionat pels Dracs que reçaupràn a 6 oras del vèspre d’autres deçauputs de la Cup: los Diables de Salford. Dracs contra Diables, aquò va petar lo fuòc!
 
De l’autre costat de la planeta, divendres, dins l’Estadi bèl de Sydney, se tendrà l’espròva de prima entre Cangorós e Kiwis. Del costat neozelandés, solament sièis finalistas de la Copa del Monde son retenguts. Dissabte a Penrith, Fidji e Samoa jogaràn la quatrena bilheta de participacion al Torneg de las Quatre Nacions de la tardor.
 
 
 
 
Alan Roch