Segon Jaume Mateu, president de l'Obra Cultural Balear (OCB), s'agís "d'un clam positiu en favor de la lenga que contrastarà e que serà una responsa a la negacion dels nòstres dreches lingüistics que representa la lei de foncion publica"; s'agís d'una lei del govèrn balear qu'amb ela lo catalan quita d'èsser una condicion per trabalhar dins l'administracion publica. 

 

Al delà de l'Òbra Culturala Baleara, la marcha es estada tanben convocada pel Consell de la Societat Civil de Mallorca (integrat per mai de 50 entitats e organizacions socialas) e per d'associacions de premsa, de musica, de vesins, de joves, de cultura, d'excursionistas, de religioses, de parents d'escolans, de païsans, de sindicats e de grops ecologistas. 158 personalitats eminentas de la literatura e dels espòrts, d'actors, de musicians e d'intellectuals an signat un manifèst apelat 'Apèl ciutadan per la lenga' en sosten a las mobilizacions. 

 

Dissabte, una manifestacion se debanèt per las carrièras de Barcelona jos l'eslogan 'Arrestem l'exterminacion del catalan dins las illas', en solidaritat amb la marcha per la lenga qu'aquel dimenge s'es debanada a Palma. 

 

 

Fa 26 jorns que Jaume Bonet, de l'associacion Jubilats per Mallorca (Retirats per Malhòrca) es en cauma de la fam per denonciar la politica contra lo catalan del govèrn balear. Bonet a recebut de nombrosas mòstras de sosten. Un autre sòci, Bartomeu Amengual, comencèt ièr la siá cauma de la fam amb l'intencion de relevar Bonet perque l'estat de santat de Bonet es tròp flac, que passa las oras colcat e recep pas mai de vesitas. Bonet a seguit los conselhs dels mètges e al ser a quitat la cauma, Amengual pren sa plaça.