La gàrdia civila espanhòla detenguèt diluns passat 21 personas per aver fach d’“apologia del terrorisme” e per aver “otratjat las victimas d’ÈTA”, amb lors publicacions sus Facebook e Twitter. Quinze d’aqueles detenguts son del Bascoat, del temps que los autres son de Catalonha, Galícia, Astúrias, Castelha e Leon. S’agís d’usatgièrs qu’an aperaquí dos mila seguidors sus Facebook o Twitter, e que segon la polícia aurián publicat mens de cinquanta messatges “amb un contengut violent”.
 
Segon çò que rapòrta Vilaweb, l’operacion es encara viva e i poiriá aver mai de detencions.
 
Segon de fonts de la gàrdia civila publicadas suls mèdias espanhòls, “aqueles usatgièrs se trufèron de qualques victimas d’ÈTA”.
 
Lo jornal espanhòl El Mundo ditz qu’aqueles messatges “manifestavan lo desir qu’ÈTA contunhèsse d’atemptar, donavan la benvenguda als presonièrs bascos que sortissián de preson, visavan de personas per que foguèsson objècte d’atemptats e fasián de referéncias umiliantas als damatges fisics patits per las victimas”. Las fonts policièras que mandèron l’informacion a aquel jornal apondèron que la tòca d’aquelas detencions “es de servir d’exemple als autres”.
 
Lo jornal basco Naiz.info rapòrta l’identitat de qualques unes dels detenguts, e relata d’acamps de protèsta en Gernika e Vitòria.
 
Segon lo jornal El País, l’afar comencèt amb una enquèsta sul compte Twitter @HumorNegro, que publicava de galejadas d’umor negre e que s’èra trufat de la discapacitat d’Irene Villa, que perdèt sas cambas en un atemptat d’ÈTA.