La crescuda de la populacion de la comuna de Sant Sulpici la Punta, en Vaurés, fa que totes los amainatjaments publics se multipliquen. Al començament de l’annada los enfants de las escòlas primàrias de la vila èran convidats a participar a un concors per trobar un nom per la novèla estacion d’esporgament que deu intrar lèu en servici. Al delà del nom, tanben caliá dessenhar una mascòta.
 
Los mainatges perpensèron pendent qualques setmanas sul sicut del cicle de l’aiga. D’unes professionals de la distribucion e de l’assaniment intervenguèron pedagogicament dins las classas. Guidats per un tecnician, foguèron convidats a vistalhar las installacions. Una jurada, compausada de sèt personas vengudas d’entitats diferentas (associacion dels Pescafins, Ostal dels Joves e de la Cultura, associacion dels Ainats, etc.), foguèt alestida e deliberèt.
 
Fin finala, la proposicion ganhanta foguèt la realizada pels vint e uèch escolans de CM1-CM2 de la classa bilingüa de l’Escòla Marcel Pagnol, bailejada per Corina Parraud. Alavetz, la novèla estacion d’esporgament serà oficialament, e en granda pompa, batejada per la consolessa e los oficials municipals. Aquesta s’apelarà d’ara enlà “Fontclara”. La mascòta portarà lo polit nom de “Morgueta la goteta”. Aquesta operacion, que recampava un fum de partenaris institucionals e associatius, fa la demostracion que la normalizacion e la socializacion de la lenga nòstra son possiblas. A Sant Sulpici e endacòm mai.
 
 
 
 
_____
La Dépêche: Saint Sulpice. Les enfants baptisent la station d’epuration