Lo programa de l’Estivada 2014 es ja publicat en linha. Sul sit del Festenal Interregional de las Culturas Occitanas podèm remarcar un saut qualitatiu quant a l’aspècte grafic, mas çò que mai remarcam es qu’ongan l’Estivada torna al centre de Rodés. Lo vilatge occitan e la scèna principala seràn plaçats sus l’Esplanada dels Rutèns, davant l’MJC de la capitala de Roergue, en tot manténer los autres espacis abituals en vila.
 
Ongan, lo festenal occitan començarà dimècres 23 de julhet en tot festejar lo 40n anniversari de Nadau, amb l’espectacle 40 ans de cançons de la banda gascona. Al delà, al programa de l’Estivada 2014 podèm trobar la plaça per la creacion mai gausarda de Xarnege o Stille Volk, o la crèma de la crèma de la musica occitana amb las polifonias del Còr de la Plana, lo reggae dels Raubacapèus, l’elèctro de Pythéas, lo punk rock de Papà Gahús… Es de soslinhar lo concèrt del cantaire roergàs Luc Aussibal e lo de la granda banda d’ska Golamàs’K que presentarà son òbra novèla Ràbia e poesia.
 
Tocant los artistas estrangièrs, l’Estivada a convidat ongan la banda bretona de punk celtic Les Ramoneurs de Menhirs e los catalans Txarango.