Après cinc ans d’assages e mai d’un milion de quilomètres d’autoestrada e d’estrada percorreguts pels Estats Units, las veituras sens menaire de Google an fach un pas enlà per venir, dins un futur pas gaire alonhat, una realitat. Qualques unes d’aqueles veïculs se son ja assajats per las carrièras de Mountain View, la vila ont i a la sedença de la companhiá californiana, e an vencut los obstacles que se presentan normalament dins una vila.
 
Coma o explica Google dins lo sieu blòg oficial, dempuèi gaireben un an, vint e quatre veituras Lexus RX450h, esquipadas amb de sensors, an circulat per las carrièras de Mountain View, malgrat las dificultats: “Un quilomètre de conducha en vila es fòrça mai complèxe qu’un quilomètre de conducha per autoestrada, amb de centenats d’objèctes desparièrs que se mòvon a partir de nòrmas divèrsas e dins un airal pichon”, segon lo director del projècte, Chris Urmson.
 
Dins aqueste vidèo, Google mòstra quals son los principals obstacles que tròban las veituras sens menaire per carrièras, e cossí se resòlvon.
 
Cal remembrar que totes los veïculs d’assag an un menaire dedins, per seguretat. Google assegura que fins ara sas veituras automaticas an pas agut cap d’accident.