Una de las vilas ont lo 1r de mai se commemòra amb de fòrça e de vam es Istambol, ont ongan las autoritats ensagèron d’empedir que los manifestants se concentrèsson dins la Plaça Taksim, centre neuralgic e simbòl del movement de protèsta contra lo govèrn turc de l’an passat. Un enòrme desplegament de milièrs de policièrs bloquèt l’accès a la plaça e al Pargue Gezi, e dispersèt las personas que s’i volián sarrar amb de gases lacrimògens e de canons d’aiga.
 
Aquela repression prenguèt un caractèr encara mai violent al Quartièr Beşkitaş, ont la polícia tirèt de balas de goma contra los manifestants, dont qualques unes respondèron amb lo lançament de coctèls Molotov e de fusadas contra los policièrs.
 
Segon qualques mèdias, i a un cinquantenat de ferits e aperaquí cent cinquanta detenguts. De mai, l’usatge intensiu de gases lacrimogèns de la part de la polícia obliguèt qualques familhas de quitar lors ostals.
 
Lo primièr ministre Recep Tayyip Erdoğan aviá ja avertit fa qualques jorns que los manifestants devián pas pensar de s’acampar dins la Plaça Taksim.