Lo Conselh General d’Aran a recebut lo Prèmi de la Generalitat de Catalonha per la Melhora Gestion Publica. Dins lo meteis acte, las botigas aranesas Alimentacion Barés, de Les, e Horn de Pan Fernando Riu, de Vielha, recebèron la distincion dels establiments centenaris amb 48 autres comèrcis.

La Val d’Aran foguèt la protagonista de la 14a edicion dels Prèmis a l’Iniciativa Comerciala e als Establiments Centenaris, que la Generalitat de Catalonha los liurèt lo 28 d’abril passat.
 
D’un costat, lo president Artur Mas autregèt lo prèmi al govèrn aranés per aver creat l’Agéncia del Comèrci d’Aran, qu’a per tòca de promòure, conselhar e dinamizar lo comèrci dins lo país occitan. Dins aquel sens, lo sindic d’Aran, Carlos Barrera, soslinhèt que “pendent er an 2013, eth Conselh Generau d’Aran recuperèc un convèni damb eth CCAM (Consòrci de Comèrç, Artesania e Mòda de Catalonha) qu’a comportat ua aportacion de 30 000 èuros destinadi ara dinamizacion des accions dera Agéncia deth Comèrç d’Aran”.
 
D’un autre costat, los establiments Alimentacion Barés, de Les, e Horn de Pan Fernando Riu, de Vielha, recebèron lo Prèmi als Establiments Comercials Centenaris, en intrant dins una lista de 50 comèrcis que lo govèrn catalan lor reconeis lor trajectòria pendent mai de 100 ans de servici qualitós e personalizat als clients, e mai que mai per lor adaptacion als cambiaments e als besonhs dels ciutadans. “Arrecéber aguest tipe de guerdon signifique que son establiments qu’an dat un servici de qualitat, personalizat as sòns clients e que s’an adaptat as cambis e as besonhs de crompa des clients, causa que merite era nòsta mès prigonda felicitacion”, çò diguèt Barrera.
 
De son costat, la conselhièra del torisme, comèrci e consume d’Aran, Anna Díaz, soslinhèt qu’“aguesti prèmis signifiquen qu’aguest Govèrn trabalhe ena bona linha, era d’aconselhar e promòir eth nòste comèrç, era linha que vò èster ath costat des associacions de comerçants entà apiejar-les en tot çò de besonh, e a de perméter qu’eth comèrç sigue un sector dinamic e capable de crear emplec”.