Lo president del Sinn Féin, Gearóid Mac Ádhaimh (Gerry Adams) foguèt mes en libertat sens inculpacion ièr de ser, segon çò que raportèt lo servici de la polícia de l’Irlanda del Nòrd (PSNI), que remetrà ara un rapòrt al ministèri public. Mac Ádhaimh lo detenguèron dimècres passat, acusat d’èsser restacat amb la mòrt de Jean McConville en 1972. Ièr afrontava sa quatrena jornada consecutiva d’interrogatòri al comissariat.
 
McConville, una veusa de trenta sèt ans e maire de dètz enfants, foguèt sequestrada a son ostal de la zòna Divis de Béal Feirste (Belfast) e assassinada d’un tir per l’IRA, que l’acusava d’aver espionat pels servicis britanics. Son còrs foguèt recuperat sus una plaja en 2003.
 
En un comunicat, Gearóid Mac Ádhaimh explica que lo mes passat li diguèron que deviá èsser disponible per parlar amb la polícia sus l’afar de McConville: “Volontàriament, soi anat aqueste ser a la reünion”, çò aviá declarat. En seguida lo detenguèron.
 
Lo partit republican difondèt tanben dimècres las declaracions de Gearóid Mac Ádhaimh, qu’abans de se presentar al comissariat, ja defendèt la siá innocéncia dins l’afar de Jean McConville. “Cresi que l’assassinat de Jean McConville e l’enterrament secret del sieu còrs foguèron una marrida causa e foguèron una injustícia per ela e sa familha”, çò diguèt Gearóid Mac Ádhaimh.
 
“S’es fach d’acusacions maliciosas contra ieu que refusi. Soi innocent de tota participacion que siá a la sequestracion, l’assassinat o l’enterrament de Dòna McConville”, çò apondèt.
 
La detencion de Gearóid Mac Ádhaimh arribèt après que lo mes passat se detenguèt ja un cap istoric de l’IRA, Ivor Bell, qu’a ara 77 ans. Bell expliquèt als academicians del Boston College dels Estats Units lo sieu passat dins l’organizacion armada de l’IRA, e malgrat que los enregistraments se deguèsson difondre solament après sa mòrt, son arribats en mans de la justícia e poirián èsser ligats a las detencions recentas.