L’agéncia espaciala dels Estats Units, la NASA, a presentat lo prototipe d’un nòu vestit espacial, que los astronautas poirián arribar de l’emplegar en de futuras missions sus la Luna o sus Mart. Lo nòu modèl es estat decidit a partir d’un vòte popular en linha que i an participat de centenats de milièrs d’internautas. Lo vestit espacial de la linha Z-2 resòlv los problèmas que los astronautas an detectat pendent las darrièras annadas e compren d’elements innovants.
 
Per exemple, es mai flexible per favorir la comoditat de l’astronauta e presenta a l’encòp d’elements mai rigids e resistents, per que sostenga de restadas mai longas en defòra de la nau o del veïcul espacial. Un autre trach que cal soslinhar d’aquel vestit son los elements reflectors, que permetràn als astronautas d’èsser vistes en cas de situacions advèrsas.
 
La NASA calcula que n’aurà alestit lo primièr prototipe en novembre, per fin de l’assajar al Centre Espacial Johnson. Se supèra las espròvas, l’Z-2 evolucionarà mai endavant vèrs lo modèl definitiu, l’Z-3.