L’indoïsta Narendra Modi, qu’emplega d’ologramas per far de mitings simultanèus, es lo favorit per venir lo primièr ministre d’Índia, en d’eleccions que s’acaban uèi.

S’acaban uèi las eleccions generalas en Índia, que lo vòte comencèt lo 7 d’abril. Dins aquel territòri de tres milions de quilomètres cairats e mai de uèch cents milions de votants, los candidats an normalament de dificultats per arribar a totes los cantons del país. Mas Narendra Modi, lo candidat del partit indoïsta Bharatiya Janata Party (BJP), a recorregut a la tecnologia per i arribar. Modi es, en mai d’aquò, lo favorit per venir lo primièr ministre.
 
E mai se manten un discors tradicionalista indian e s’es acusat d’aver incitat lo chaple d’aperaquí mila musulmans en Gujarat fa qualques ans, Modi se presenta amb un imatge plan modèrne e tecnologic, en contrast amb lo candidat Rahul Gandhi, del Partit del Congrès.
 
N’es una mòstra l’emplec de la tecnologia olografica dins los mitings. Modi enregistra de discorses dins un estudi e se distribuisson simultanèament, en forma d’olograma, sus mai de cent emponts del país e tanben via Internet.