An enebit la Fashion Week de Bordèu. Semblava d’èsser un temptatiu interessant de crear un eveniment de la mòda al país, per cessar de dependre de París, mas lo prefècte interdiguèt l’eveniment en rason d’infraccions als drech del trabalh. Los participants e los organizaires o an fòrça mal viscut.
 
Dissabte a miègjorn s’arrestava la setmana bordalesa de la mòda. Segon un comunicat de la prefectura, los contraròtles, que divendres los efectuèt sus plaça lo grop antifraudariá de la Direccion de la Santat Publica del departament de Gironda, revelèron “d’infraccions fòrça nombrosas” a la legislacion. An reprochat a l’organizacion d’aver pas pro de qualitat per organizar l’eveniment, de declarar solament tres salariats sus un desenat d’emplegats presents, de dispausar pas d’autorizacion prefectorala per embauchar de menors de mens de setze ans e d’aver establit de contractes non confòrmes per l’emplec d’ostessas.
 
L’organizaire, Olivier Mboungou N Kounga, foguèt entendut pels servicis de la polícia. Après volguèt parlar als mèdias, mas fin finala o faguèt per mejan d’una pòrtavotz perque se sentissiá tròp chocat per parlar dirèctament. En son nom parlèt Sandrine Bégout, una cofaira que deviá participar a l’eveniment. Bégout tranquillizèt los participants: “totas las personas seràn onoradas” e mai se veniá de reconéisser de pèrdas economicas enòrmas. L’organizaire reconeguèt “de mancanças dins los contractes” mas considerèt que la sancion èra tròp sevèra, e que “damatja l’imatge de Bordèu”.
 
La Fashion Week de Bordèu deviá prepausar 40 desfilats de prêt-à-porter, d’streetwear, de joves creators, de linjariá e de nauta cordura.