274 personas son mòrtas en un accident dins una mina de carbon a l’oèst de Turquia. La tragèdia se passèt la matinada de dimars a Soma, dins la provícia de Magnesia de Sipil (Manisa), a qualques 300 quilomètres al sud d’Istambol. Un afondrament seguiguèt una explosion quand dins la mina i aviá 787 minaires, que 360 capitèron de sortir. Los autres son demorats enterrats e n’an salvat un ochantenat de ferits, e mai se la majoritat son mòrts. Segon las previsions, lo nombre de mòrts pòt arribar a 300.
 
Lo primièr ministre, Recep Tayyip Erdoğan, cancelèt son viatge en Albania e anèt sus plaça. De centenats de personas son tanben sus plaça per seguir lo salvament e “partejar la dolor”. Lo ministre de l’energia, tanben present, diguèt als mèdias que la mina s’enfonzèt a causa d’una explosion atribuida a un transformador electric. Los minaires èran entre 1000 e 4000 mètres jos tèrra e la majoritat serián mòrts pel fum que provoquèt l’explosion. Lo govèrn turc a decretat 3 jorns de dòl.
 
L’accident s’es passat en una mina privada, que sos proprietaris diguèron que l’enquèsta es ja mesa en marcha. Assegurèron als mèdias que la mina observava las nòrmas de seguretat mai estrictas. Mas los sindicats de minaires fa de temps que denóncian qu’en Turquia i a d’accidents tròp sovent.