José Bové a fach una crida als cònsols del departament dels Pirenèus Atlantics per que desobesiscan al prefècte, en nom del drech europèu, per protegir las Calandretas e las Ikastolas. Aital o remembrava lo politician occitan a Sud-Ouest, a prepaus de sa participacion de sosten a la fèsta de las Ikastolas en Bascoat.
 
Es aital que Bové prepausa de luchar contra la decision del prefècte del departament dels Pirenèus Atlantics (Bearn, Bas Ador e Bascoat Nòrd), qu’exigís de respectar la lei Falloux, una lei de 1850 qu’enebís la mesa a disposicion de locals als establiments privats. Dins aquel contèxt d’una lei del sègle XIX, e en cas de son aplicacion estricta, lo prefècte a demandat a la vila d’Artics de barrar la Calandreta lo 4 de julhet que ven, çò que provoquèt ja una protèsta de fòrça gents a Pau lo 15 de març passat.
 
Bové encoratja los cònsols a desobesir al prefècte amb la mesa a disposicion de bastiments, e quitament de construccions, per las escòlas Calandretas o Ikastolas. Dins aquel sens, lo deputat milhavés assegura qu’en cas d’afrontament entre un municipi e un departament, se poiriá demandar l’intervencion de la Cort de Justícia de l’Union Europèa o de la Cort Europèa dels Dreches Umans.
 
Bové tanben compara las politicas lingüisticas d’autres estats d’Euròpa en amb la de l’estat francés. “Ai l’impression qu’en França sèm dins una autra istòria. Pr’aquò, aquesta diversitat de lengas, de culturas, es al còr de las preocupacions d’Euròpa”. En mai d’aquò remembra qu’“Euròpa a una devisa: «units dins la diversitat». Aquò vòl dire quicòm”.
 
José Bové mençona pereu lo Manifèst per las Minoritats Nacionalas e Lingüisticas de l’UE qu’impulsèt François Alfonsi e que signèron un cinquantenat de deputats, e soslinha que la mitat dels vòtes contra aquel document provenián d’elegits franceses.