Almens un vintenat de personas serián ja mòrtas dins una èrsa de protèstas en Vietman contra los interèsses chineses al país. Los mòrts serián sètz chineses e cinc vietnamians, mas aquelas informacions son pas mesas a jorn a l’encòp per totes los mèdias.
 
L’espelida de las protèstas antichinesas es originada per l’installacion d’una plataforma petrolièra chinesa dins la mar, vèrs Vietnam, e per la disputa de certanas illas en litigi entre los dos païses.
 
De milièrs d’obrièrs an atacat de desenats de fabricas chinesas, e n’an incendiat qualques unas, e las violéncias venon de mai en mai antichinesas. Qualques usinas, que son pas chinesas, an arborat las bandièras de lors païses, coma es lo cas d’una de coreana, per evitar l’assaut dels manifestants.
 
L’origina d’aquelas violéncias la cal cercar dins las darrièras garrolhas sus la Mar de China Meridionala. Tant Vietnam coma China revendican que las Illas Paracèl son lors, e ne vòlon esplechar las ressorsas. I aguèt un afrontament de dos vaissèls d’aqueles païses, amb de collisions e l’emplec de canons d’aiga. Près d’aquelas illas, China vòl bastir una plataforma petrolièra.