Lo Partit de la Nacion Occitana (PNO) ensaja tornarmai d’estendre lo messatge occitanista amb una candidatura nomenada “Occitània per una Euròpa dels Pòbles”. Segon lo jornal catalan Nationalia, aquela candidatura es la sola estrictament occitanista. Dins aquel sens, lo jornal catalan rapòrta que lo Partit Occitan (PÒC) sosten la candidatura ecologista dirigida per José Bové.
 
“Per las nacions sens estat d’Euròpa, l’enjòc d’aquestas eleccions es de bastir l’Euròpa dels pòbles, federala, descentralizada, democratica e sociala”, çò ditz lo PNO, segon Nationalia. A partir d’aquí lo PNO ditz que cal combatre los partits “sobeiranistas franceses de drecha e d’esquèrra que s’opausan al projècte europèu e que son contra la reconeissença de las lengas e nacions sosestatalas”.
 
Nationalia tanben soslinha que lo PNO a pas reüssit dins son prètzfach de formar una candidatura conjoncha amb de formacions catalanas e bascas; mas lo programa de sa candidatura (“Occitània per una Euròpa dels Pòbles”) demanda que l’Union Europèa reconesca aquelas tres nacions (l’occitana, la basca e la catalana), e aital se presenta per la circonscripcion sud-occidentala de l’estat francés.
 
Dins son programa, la lista occitanista insistís que cal democratizar las institucions europèas, refortir lo Parlament Europèu e aplicar de politicas de defensa de l’environament, de desvolopament economic local e de melhorament de las comunicacions interioras e exterioras en Occitània. Tocant la politica internacionala, dison que cal èsser atentius a las negociacions que l’Union Europèa faga amb los Estats Units, per que i aja pas d’empediment a la proteccion dels productors e dels consumaires europèus.