Lo 18 de mai de 1964 fasiá solelh a Londres. Fòrça joves mods e rockers de la banlèga decidiguèron de prene la mòto e de se desplaçar fins a las comunas litoralas del sud d’Anglatèrra. Mas aquela dimenjada de Pascas de fa cinquanta ans foguèt pas tan pacifica coma se prevesiá. Las plajas de Bournemouth, Brighton, Clacton e Margate venguèron, involontàriament, la scèna de batalhas entre los dos collectius, que foguèron immortalizadas dins lo filme Quadrophenia (1979), inspirat del disc del meteis nom de la banda mod The Who.
 
Las batèstas foguèron multitudinàrias e lor resultat foguèt de desenats de ferits e de detenguts per la polícia, qu’en qualques cases poguèt pas conténer las doas bandas. Solament las duras penas impausadas per la justícia empediguèron qu’a l’estiu se tornèsson passar las batèstas sus las plajas del comtat de Sussex.
 
Las susmautas juvenilas d’aquel an 1964 aguèron tanben un important impacte dins la societat britanica. Mas fa dètz ans, en escasença del quaranten anniversari, The Independent publiquèt un reportatge que, a travèrs de testimònis presencials, questionava d’aspèctes importants del relat dels incidents que ne faguèt la premsa jauna de l’epòca.
 
S’i explicava, per exemple, que qualques fotografes de premsa paguèron las bandas supausadament rivalas per que simulèsson de bastèstas. Los mèdias d’alavetz expausèron los incidents fòrça pièger que çò que se passèt de verai, çò denonciava lo jornal. Se diguèt que las drògas foguèron la causa principala de l’esclatament de la violéncia.
 
Sus la cultura mod, e sus la musica urbana que nasquèt alavetz, podèz legir las contribucions de Marc Espí dins Jornalet.