Dijòus que ven, 22 de mai, jutjaràn dins la preson de Vallette, en la banlèga de Turin, quatre militants ecologistas acusats de destruire de material pendent una protèsta contra la linha de nauta velocitat dins la Val de Susa (Arpitània), lo 26 de genièr passat. Los acusats, qu’aurián sabotat de material d’un chantièr de la linha contra la quala protèstan, son en isolament complet dempuèi lor arrestacion e seràn entenduts per vidèo dempuèi lor cellula. Lor an aplicat un arsenal de leis antiterroristas e los quites membres de la jurada seràn escortats per de policièrs, segon çò que rapòrta Reporterre.
 
La presidéncia de la Comission Europèa s’es portada partida civila al títol de sos interèsses dins lo projècte de la linha de granda velocitat, que deu passar per aquela val arpitana e que los ecologistas refusan.
 
Ça que la, lo Forum Civic Europèu a lançat una crida en Euròpa tota per que de juristas e d’observadors dels dreches umans sián presents aqueste dijòus, a la dobertura del procès.
 
Las manifestacions de sosten als detenguts son nombrosas, mai que mai a causa del tractament antiterrorista. Mas cal soslinhar la manifestacion que s’amassèt lo 25 de febrièr passat, a Bussoleno (Arpitània), contra la dicha linha ferroviària e per la liberacion dels camaradas que seràn jutjats dijòus.
 
La ligason ferroviària transalpenca entre Lion e Turin, passant per la Val de Susa, es un projècte dels estats francés e italian qu’a desvelhat de fòrtas protèstas dels ecologistas pr’amor dels impactes importants qu’aurà sul territòri.