Un grop de 26 femnas amorosas de curats an mandat una letra al papa Francés per li demandar de revisar lo celibat dels prèires. Se tracta d’un grop de femnas qu’an una relacion amorosa de qualque biais amb un prèire e qu’o voldrián far sens besonh de s’amagar e, per aquò, demandan al pontife que lo celibat siá facultatiu; aital o a publicat Vatican Insider.
 
“Sèm un grop de femnas qu’escrivèm per trencar la paret del silenci e de l’indiferéncia que patissèm cada jorn. Caduna de nosautras ten, o a tengut, una relacion sentimentala amb un prèire”, çò ditz la letra; sas autrises planhon que las solas alternativas qu’an es que, siá lor amorós quita lo sacerdòci, siá contunhan de s’aimar “en secret”. “Lo servici a Jèsus e a la comunautat seriá exercit amb mai de fòrça per un prèire que combinariá lo sacerdòci amb la vida conjugala”, çò apond la letra.
 
Lo Vatican a pas fach cap de comentari sus aquela informacion e, de fach, lo papa Francés a pas res dich sus aquel sicut. Si que ne parlèt son predecessor, Beneset XVI, que defendèt la “valor sagrada” del celibat, e mai se reconeguèt que s’agissiá pas de cap de “dògma”.