An descobèrt qui son los parents d’Aubèrta, la petita orsalhona que trobèron perduda en Aubèrt (Val d’Aran) en abril passat. Segon las primièras analisis d’ADN que lo Conselh General d’Aran a fach dins un laboratòri de Grenòble (Arpitània), sos parents son l’ors Pyros e l’orsa Fadeta. Aubèrta es a l’encòp filha e felena de Pyros, qu’es tanben lo paire de Fadeta.
 
Encara sabon pas per quina rason l’orsalhona se separèt de sa maire. Al delà “cau remercar qu’Aubèrta serie frut d’un prumèr enfantament de Fadeta, neishuda en 2010, e qu’era ei ua mair primairenca e sense experiéncia, e açò poirie refortir era ipotèsi d’ua separacion accidentau de forma naturau”, çò ditz lo govèrn aranés.
 
Lo Conselh General d’Aran la menèt dins un embarrat de 5000 mètres cairats ont se l’alimenta segon un protocòl internacional per garentir l’isolament de la bèstia a respècte de las personas. La liberaràn dins sièis meses, se la maire l’a pas encara localizada.