Après los fòrts auratges suls Balcans qu’an fach mai de 200 millimètres per jorn, lo temps es ja bèl. Mas ara lo chepic es lo risc que las minas sián desterradas, qu’encara n’i a pertot dempuèi la guèrra de Bòsnia. “Un vast nombre de minas a fach la situacion mai grèva e [complica] los esfòrces d’ajuda”, çò declarèt lo pòrtavotz de la Crotz Roja, que descriguèt los aigats coma “las piègers inondacions en mai d’un sègle”.
 
Lo nivèl de l’aiga del riu Sava a superat lo recòrd de nautor amb 6,3 mètres dins las vilas de Šabac e Sremska Mitrovica (Serbia). Al delà, lo Ministèri de la Seguretat de Bòsnia e Ercegovina a qualificat las inondacions coma la pièger catastròfa de l’istòria del país. Las pluèjas lai an superat los 250 millimètres a Tuzla: las mai fòrtas se son passadas los 15 e 16 de mai.
 
Los grands aigats an ja tuat almens un dotzenat de personas, mas la tragèdia contunha. Segon lo meteorològ de CNN, Pedram Javaheri, pendent tota la setmana las inondacions pòdon far mal, e i a de rius que van créisser dins gaire de temps.