Lo primièr ministre francés, Manuel Valls, participèt dimècres passat a Barcelona a un miting del Partit Socialista de Catalonha (PSC-PSÒE). Lai faguèt solament una petita e subtila referéncia al procès d’independéncia de Catalonha: “Permetèm pas que se produgan de nòvas fracturas, mai que mai aicí a Barcelona e en Catalonha. Çò que nos jonh nos refortís; çò que nos devesís nos afeblís.” Mas aquela frejor de Valls envèrs l’independéncia de Catalonha contrasta fòrça amb la determinacion de qualques unes de sos parents catalans que se declaran independentistas. Las principalas televisions e ràdios de l’estat francés n’an parlat.
 
France 24 soslinhava dimècres, a prepaus de la participacion de Valls a la campanha dels socialistas catalans, qu’“una partida de la familha del primièr ministre francés, qu’encara demòra en Catalonha, se son engatjats per l’independéncia de la region”. Aquela television apondiá qu’aquela posicion “poiriá prejudicar Manuel Valls que, fins ara, a pas reüssit a se prononciar explicitament sul tèma”.
 
De son costat, una còla d’Europe 1 parlèt amb tres parents de Valls: un nebot, la sòrre e un cosin. Lo nebot, Lluís, es menaire d’autobuses; critica las reduccions budgetàrias que son oncle a fach en França e pensa qu’es tròp dur amb los ròms. Tanben diguèt qu’anariá pas al miting perque vòta pas pels socialistas. La petita sòr, Giovanna, si que sostenguèt son fraire e anèt al miting socialista.
 
“La familha Valls a totjorn defendut vigorosament l’identitat catalana”, çò apond Europe 1. E parla d’un cosin de Valls, Felip, “independentista convencut”, qu’esperava que dimècres de ser, lo sieu cosin desmembrèsse pas sas raices e que parlèsse en catalan. Mas Valls parlèt la màger part de son temps en espanhòl. Solament prononcièt quatre mots en catalan per dire que pas jamai auriá imaginat que tornariá a Barcelona coma primièr ministre de França.



Neveu de Valls : "je le trouve trop dur avec...per Europe1fr