Las eleccions municipalas de la debuta de l’annada son estadas l’enchaison per l’occitanisme politic de s’agropar dins lo movement originau Bastir. Per las eleccions europèas, torna trobar sas divisions.

L’experiéncia de Bastir se serà pas tornada far dos mes après las eleccions municipalas. Pasmens lo movement vòu contunhar d’èsser “un luòc de reflexion e de concertacion dobèrt” e constituirà una associacion d’elegits sus la basa de l’anciana ACEÒC (Associacion daus Cònsols e Elegits Occitans) a la fin de l’estiu. Geli Grande, candidat sus la lista “Occitània per una Euròpa daus Pòbles”, dins la circonscripcion Sud-Oèst, explica que queu movement, de tot biais, “aviá per tòcha de portar daus candidats sus de las listas per las municipalas de 2014”. “Ren èra pas previst per las eleccions europèas”, çò declara. “Doncas los de Bastir que volián sosténer la lista EELV per las europèas o podián far e los coma nosautres que volián far una lista independenta avián tota libertat per o far.” L’occitanisme politic torna donc a sas chausidas estrategicas tradicionalas.
 
Occitània es partejada en cinc circonscripcions: la circonscripcion unica espanhòla e la circonscripcion Nord-Oèst italiana, ont pas un candidat occitanista se presenta, e las circonscripcions francesas Sud-Oèst, Sud-Èst e Massís Centrau-Centre.   
 
Dins lo Sud-Oèst, lo Partit Occitan presenta una candidata sus la lista EELV menada per José Bové. “Que son daus liams naturaus emb José Bové o Catherine Grèze”, çò precisa Dàvid Grosclaude, president dau Partit Occitan, a França 3, “faguèron lor trabalh a Estrasborg per çò de las lengas, e coma son ilhs que demandèron ua preséncia occitana sus lor lista, vese pas perqué auriam refusat. Partejam mai d’un ponch de visda emb ilhs sus Euròpa”. La candidata es Régine Barthélémy, avocata montpelhierenca e companha de Joan Loís Blenet, president de la Confederacion de las Calandretas. “La lenga e la cultura occitanas fan partida de ma vida”, çò ditz dins sa profession de fe.
 
L’autra lista de la circonscripcion es una lista autonòma eissida d’una crida dau Partit de la Nacion Occitana (PNO) aus militants autonomistas occitans, bascos e catalans. “L’idèa de far una lista nos es venguda au mes de novembre de 2013”, çò explica Geli Grande, numèro dos de la lista. “D’entrada es estada concebuda coma una lista de dobertura. Demandèrem au dintre dau PNO los qu’èran d’acòrdi per se far portar per las europèas. Puei demandèrem a d’autres occitanistas de nos rejónher (Iniciativa per Occitània, Libertat, País Nòstre). Iniciativa per Occitània nos respondèron que trobavan aquò interessant mas que s’investirián pas aquí dedins, Libertat respondèron negativament e País Nòstre diguèron qu’èran fòrça coentats per las eleccions municipalas. Fin finala son d’autres occitanistas sens etiqueta que nos venguèron rejónher.” Las doas autras minoritats de la circonscripcion son estadas aprochadas tanben. “Per los bascos solet lo PNV dau Bascoat Nòrd nos respondèt. Nos rescontrèrem mas poguèrem pas far lista comuna que lor lista èra ja clavada. Dau costat de Catalonha Nòrd avèm tiradas totas las esquilas... e degun venguèt per èsser sus la lista.” Entau la lista es compausada unicament d’occitanistas. “Per nòstre programa decidiguèrem de contunhar de prene en compte las revendicacions daus bascos e daus catalans de la circonscripcion Sud-Oèst”, çò precisa totparier Geli Grande.
 
Dins lo Sud-Èst, la situacion es diferenta. Lo liam sembla romput entre los autonomistas e los ecologistas. Sembla que siá en partida la constitucion de la lista EELV emb l’integracion de Karim Zeribi, qu’i menèt. François Alfonsi, eurodeputat còrs sortent, se seriá trobat au mielhs en quatresma posicion, çò qu’auriá pas assegurat sa reeleccion. Mas las relacions tendudas entre l’eurodeputat e sos aliats ecologistas i devon pas èsser estrangieras tanpauc. Entau François Alfonsi presenta una lista “Regions e Pòbles Solidaris” qu’amassa las diferentas minoritats presentas sus las circonscripcions: los occitans emb Anna-Maria Hautant e Arvèi Guerrera dau Partit Occitan, los arpitans emb Laurent Blondaz dau Movement Region Savòia e los berbèrs emb Belkacem Lounès dau Congrès Mondiau Amazigh. Lo PNO, qu’es pas present sus la lista, li pòrta totparier son sosten.
 
La darriera circonscripcion amassa tres regions: doas occitanas (Lemosin e Auvèrnha) mai la region Centre, sens vertadiera identitat, emb Berrí e la Vau de Léger. La constitucion d’una lista autonomista i es donc fòrça mai complicada. Aquí, la lista EELV menada per l’auvernhata Clarisse Heusquin es sostenguda per lo Partit Occitan quitament se pas un de sos militants s’i presenta. Sens vertadiera posicion desvolopada sus la question lingüistica, la candidata ecologista mai son esquipa aculhisson fòrça positivament l’occitan dins la campanha. Sus los malhums sociaus, esitan pas a difusar los messatges dins la lenga que pòdon far lors sostens occitanistas. Dins la lista oficiala de las candidaturas trobam pasmens una lista Regions e Pòbles Solidaris, constituida per daus militants occitans e còrs. En fach, s’agís d’una error de timing dins lo depaus de las candidaturas. Per accedir a la television, un partit deu depausar cinc listas. Èra la lista de secors per aver drech a la campanha televisada, e es estada depausada quauques minutas abans l’arribada de la lista d’otramar a la tota fin dau relambi legau.
 
Per quelas eleccions, los occitans que vòlon marcar lor estachament a la defensa de lor cultura per lor bulletin de vòte auràn dins chasca circonscripcion una lista quitament se la dinamica unitària de Bastir es pas au rendètz-vos. Mas coma o ditz Geli Grande, “los uns e los autres fan avançar la causa occitana e occitanista. Es tot çò que compta”.   
 
 
 
 
Maime Caillon