Lo govèrn chinés parla de “terrorisme” e promet de punir los colpables. Lo Congrès Mondial Oigor ditz que las “politicas repressivas” de Pequin an una “relacion dirècta” amb l’atac.

Almens 31 personas moriguèron dijòus passat, e 94 foguèron feridas, en un atac amb de bombas al mercat d’Ürümchi, la capitala del Turquestan Oriental (Xinjiang Oigur, segon la denominacion oficiala chinesa). L’atac, dijòus de matin segon l’ora locala, se faguèt amb dos veïculs que lancèron d’explosius a las practicas del mercat, abans que las doas quitas veituras esclatèsson, segon çò que rapòrta l’agéncia chinesa Xinhua, en citant de testimònis dirèctes.
 
Lo govèrn chinés foguèt rapid a acusar lo “terrorisme” dins aquel atac, lo pièger al Turquestan Oriental dempuèi d’annadas. Lo president de China, Xi Jinping, prometèt de punir los “terroristas”. Lo ministre de la Seguretat Publica, Guo Shengkun, se desplacèt al Turquestan Oriental per i dirigir un grop de trabalh e per supervisar l’enquèsta.
 
I a pas de donadas suls autors concrets de l’atac. Dins totas las escasenças anterioras que s’es produch un atac d’aquelas caracteristicas, lo govèrn chinés a acusat las organizacions armadas independentistas oigoras, que voldrián aténher la secession del Turquestan Oriental per la via violenta. Dins aqueste article de Sinosphere (lo blòg especializat sus China del New York Times), l’autritz cita un individú restacat amb las operacions antiterroristas chinesas qu’“es segon el pas gaire senat” de dire qu’aqueles atacs son “organizats” per de grops armats, e qu’es mai corrècte de dire que son “influits” per aqueles grops.
 
Lo Congrès Mondial Oigor, organizacion representativa del nacionalisme oigor en exili, se ditz totjorn sceptic sus los autors dels atacs violents en Turquestan. Aqueste còp es pas estat una excepcion: Dilshat Rexit, pòrtavotz del Congrès Mondial Oigor, diguèt a Reuters qu’èra pas segur de saber qual aviá comés l’atac, mas qu’en tot cas “la volatilitat de la situacion e las politicas repressivas de Pequin dins l’airal i an una relacion dirècta”.
 
Pendent la meteissa setmana, un tribunal chinés a condemnat 39 oigors a divèrsas penas de preson dins l’encastre d’una operacion contra lo “terrorisme violent”, segon de fonts oficialas chinesas. Entre las cargas contra los condemnats i a la difusion de l’òdi etnic e del jihad.
 
Lo Turquestan Oriental es un territòri estrategicament fòrça important per China. En aqueste article de novembre passat, Nationalia n’explicava qualques claus, tant economicas coma demograficas.
 
 
 
 
 
 
Aqueste article es adaptat de Nationalia, amb qui Jornalet a un acòrdi de cooperacion.