Las tensions politicas entre Russia e los Estats Units meton en dangièr lo desvolopament internacional d’ITÈR, lo reactor nuclear de fusion del sit de Cadaracha, a Sant Pau de Durença (País d’Ais). Lo conselh de direccion del consòrci internacional se deviá reünir los 18 e 19 de junh que venon a Moscòu amb de representants dels 34 païses membres. Mas pr’amor de las mesuras que los Estats Units e Russia an pres per se sancionar, los responsables d’ITÈR an desplaçat la reünion al sit de Sant Pau de Durença, ont i a lo quartièr general del consòrci.
 
Ça que la, lo cambiament del luòc d’amassada es pas la dificultat mai granda del projècte. Los Estats Units an menaçat un còp de mai de quitar lo projècte. Aqueste còp an estimat que lor contribucion en natura lor èra mai cara que çò qu’avián previst e reclaman la destitucion del director general del consòrci, lo japonés Osamu Motojima. Lo blòg de sciéncia de Libérationne publica un bèl reportatge.
 
ITÈR es la sigla en anglés de Reactor Termonuclear Experimental Internacional, e tanben vòl dire “camin” en latin. Es un projècte internacional de recèrca e estudi per la construccion d’un reactor de fusion nucleara de granda escala, que permetriá d’obténer d’energia coma las centralas nuclearas, qu’a l’ora d’ara foncionan amb de reactors de fission. Lo projècte es compausat per l’Union Europèa, Soïssa, China, Índia, Japon, la Corèa del Sud, Russia e los Estats Units, e es previst que se meta en marcha al País d’Ais en 2016.