Lo Partit Popular Europèu a ganhat l’eleccion al Parlament Europèu mas en perdent fòrça vòtes. Los pròeuropèus mantenon lor majoritat. Los populismes e ultradrechismes puèjan, amb l’estat francés en tèsta. En Grècia Syriza ganha, e en Flandra e Catalonha los independentistas s’impausan.
Crisi politica dins l’estat francés
Lo partit ultradrechista del Front Nacional, qu’amb un discors racista e chauvinista lo presidís Marine Le Pen, s’es impausat a las eleccions europèas dins tot l’estat francés en obtenent aperaquí 25% dels vòtes, davant l’UMP, qu’a la segonda plaça, n’auriá obtengut 21%. Los socialistas de François Hollande serián los tresens mai votats amb mens de 15% dels vòtes, seguits per los liberals UDI-Modèm (10,3 %), per los Verds de José Bové (9,40%) e per lo Front d’Esquèrra (6,5%).
Aquel resultat, un “sisme” segon lo primièr ministre Manuel Valls, a portat lo govèrn francés a la crisi. Abans de conéisser l’escrutini, Marine Le Pen aviá demandat la dimission de Valls e la dissolucion de l’Assemblada Nacionala. Uèi se debana una reünion de crisi a l’Elisi. Lo president, François Hollande, a convocat los ministres Manuel Valls, Laurent Fabius, Michel Sapin, Bernard Cazeneuve, Stéphane Le Foll e Harlem Désir.
Dins l’estat francés la participacion es estada fòrça bassa. Per contra, en Catalonha e Aran, ont la populacion sap pas encara se poirà votar o pas per son independéncia en novembre que ven, l’enveja de votar s’es manifestada dins la participacion mai nauta de son istòria.
Los partisans de l’independéncia s’impausan en Catalonha
Dins l’estat espanhòl, lo Partit Popular a ganhat l’eleccion mas a perdut 8 deputats. Tanben los socialistas ne pèrdon 9. La tresena plaça es per la coalicion d’esquèrra amb los Verds, e la granda revolucion es estada Podemos, un partit nòu d’esquèrra alternativa, qu’a capitat 5 deputats.
En Catalonha e Aran, ont la participacion a pojat fins a tocar lo 50%, Esquèrra Republicana de Catalonha (ÈRC) a ganhat l’eleccion per lo primièr còp après lo franquisme amb 23,67% dels vòtes, davant Convergéncia e Union amb 21,85%. Amb aquel resultat, los independentistas catalans an obtengut 55,51% dels vòtes fàcia al 30,37% dels unionistas espanhòls.
Lo president de Catalonha, Artur Mas, felicitèt los ganhants e afirmèt qu’aquel resultat assolidava sa conviccion de menar endavant lo referendum per l’independéncia lo 9 de novembre que ven.
En Aran
En Aran, Convergéncia s’impausariá leugièrament als socialistas e als populars, amb aperaquí 20%, fàcia al 17% dels socialistas e al 16% des populars. Lo vòte pels partisans de l’independéncia de Catalonha en Aran, amb lo vòte pels partits unionistas espanhòls, serián egals a l’entorn de 40%.
La creissença d’ÈRC en Aran es remirabla se comparam l’11,4% dels vòtes obtenguts ara amb lo 3,5% qu’atenguèt en 2009. Convergéncia a ganhat per lo primièr còp una eleccion europèa al país del temps que populars e socialistas an davalat considerablament.
L’ultradrecha tanben en Danemarc
Una autra formacion ultradrechista, lo Partit Popular Danés, s’es impausada en Danemarc amb aperaquí 23% dels vòtes. Lo Partit Socialdemocrata de la primièra ministra Helle Thorning-Schmidt seriá segond amb un pauc mai de 20,5% dels vòtes, seguit pel Partit Liberal e del Partit Socialista Popular.
Syriza a capitat en Grècia
La coalicion d’esquèrra radicala Syriza, menada per Alexis Tsipras, qu’es candidat per presidir la Comission, auriá ganhat lo vòte en Grècia, seguida pels conservators del primièr ministre, Antonis Samaras. Lo partit neonazi Chrysi Avgi (Alba Daurada) demorariá en tresena posicion e poiriá obténer dos eurodeputats.
Lo Partit Democratic de Renzi a ganhat en Itàlia
Lo Partit Democratic del primièr ministre Matteo Renzi a ganhat en Itàlia amb aperaquí 33% dels vòtes. En segonda posicion i auriá lo Movement Cinc Estelas de Beppe Grillo, e lo partit de l’èx-primièr ministre Silvio Berlusconi, Forza Italia, es la tresena fòrça.
En Alemanha Merkel ganha e los eurosceptics auràn lors deputats
En Alemanha a ganhat tornarmai lo blòc conservator de la cancelièra Angela Merkel amb 36% dels vòtes. Los socialdemodratas, amb lo socialista Martin Schultz a la tèsta, son en segonda posicion amb 27,4%. Los Verds serián la tresena fòrça. Cal remarcar lo nòu partit, Alternativa per Alemanha, que cèrca de sortir de l’èuro, e qu’obtendrà sa representacion dins l’eurocambra amb lor 7% dels vòtes.
L’oposicion socialista a vencut en Portugal dins una participacion minimala
Lo principal partit de l’oposicion en Portugal, los socialistas, a superat la coalicion del Partit Socialdemocrata (PSD) qu’es al govèrn e dels democrestians del CDS-PP. En Portugal, l’abstencion se seriá situada al dessús de 60%.
Los independentistas flamencs an ganhat las eleccions bèlgas
En Belgica se debanavan tanben d’eleccions federalas, que las an ganhadas los independentistas flaments de l’NVA, amb aperaquí 26% dels vòtes. Seguisson los democratas crestians amb 15%. Lo partit socialista del primièr ministre, Elio di Rupo, a patit una granda revirada e solament a obtengut 5% dels vòtes.
Dins lo parlament flamenc, la victòria dels independentistas es estada encara mai frapanta, amb aperaquí 32% dels vòtes. Per contra, dins lo parlament valon, lo partit socialista es lo que ganha, amb 30%, e mai s’a davalat dempuèi lo darrièr vòte. A Brussèlas, lo partit socialista e los liberals se disputan la victòria.
Eleccion en Ucraïna
L’oligarca Petro Poroshenko ganhèt ièr las eleccions presidencialas en Ucraïna, qu’amb mai de la mitat dels vòtes èra ja lo favorit, davant l’èx-primièra ministra Iuliia Tymoshenko qu’es en segonda plaça amb una diferéncia fòrça granda.
“Soi convencut qu’aquela eleccion portarà fin finala la patz en Ucraïna, qu’arturarà lo caos, que metrà fin a la terror dels bandits a l’èst”, çò diguèt Poroshenko al moment de votar, çò rapòrtan qualques mèdias internacionals.
A l’èst del país an boicotat l’eleccion. Dins la vila de Donetzk i aviá pas cap de collègi electoral dobèrt. De fach, dins tota la region, que proclamèt son independéncia fa qualques jorns, solament 12 districtes electorals an dobèrt.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Per informacion : aquí las resultas de las eleccions europèas a França, calculada en rapòrt al nombre total d'inscrits (e non pas sonque los qu'an jutjat util d'anar votar per de deptutats costoses e que decidisson pas de res) :
Front Nazional :11%
UMP (dreita descomplexada) : 9%
PS (dreita complexada) : 6%
UDI (dreita a pro pena complexada) : 4%
EELV (que s'imagina ecologistas e que luchan pas contra lo productivisme) :4%
FRONT DE GAUCHE (que se crei a esquèrra que que son principal representant mespresa las lengas dels pòbles) : 3%
Los abtencionistas descorats d'aquel tescut politic desleial an fait la rèsta.
Nos cal redigir quaserns de doléncias e establir d'estats generals per proclamar de nòvas republicas (una occitana, una catalana, una basca, una francesa… una per cada pòbla tornat a sa sobeirania)
#10 Vertat que las normas europencas son de tria :
La discutida del taus de sucre dins la confituras passar de 60% a 50% apèi tres annadas d'estudis un rapòrt de 122 paginas lo tot per un còst de 90 000€
Te parlarai pas tanpauc de la regamentacion dels "essuie glaces " dels trcators. Ni mai d'el calbrage de las bananas que devon mesura X, Parlarem pas tanpaux del pès dels concombres cultivats en plen aire que deu esser de 180 gr e lo cultivat al recès de 250 gr. Que dins lo meteis paquet de concombre la diferençia de pes dintre lo mai pesuc e lo mens pesuc deu pas esser superirora a 100gr a la condicion que lo concombre lo mens pesuc del paqueton siaguesse dintre 180gr e 400gr e 150 gr. quand lo concombre mens pesuc es al pus mens de 400gr.
En aqueth moment, cau gardar lo cap hred pr'amor que seron pas majoritaris los eurosceptics dins lo parlament europeu. Qu'es pas ua victòria deu partit neopopulist, es un messatge de ua part deus francesos que significa "Qu'avon paur de ço qu'es different de lo noste e volon pas cambiar".
Aquera situacion es lo resultat logic de la manca d'informacion sus lo trebalh deras institucions europeas. Los mèdias nacionaus que parlan mai dera vertadèira incompetència deu Estat Francés en materia d'aplicacion deras normas europeas. Lo problèma deus Francesos es l'Estat Francés !!
Escriut per un francés d'origina portuguesa en Gasconha
Adieu a totes,
Es interessant de ligar las eleccions europèas amb las que se debanèron en Ucraïna; e coma o diguèri temps passat, la situacion extremista es mai preocupanta en Euròpa e subretot en França qu'en Ucraïna ont los partits d'extrèma drecha capitèron pas grand causa; e mai lo candidat jusieu Rabinovych faguèt de resultats melhors... demostracion facha doncas del discors fallaciós de Vladímir Pótin, de son administracion, dels mejans de comunicacion russes rosegats pel poder e censurats, e de totes los incondicionals e defensors de la politica del dictator rus...
Per çò qu'es de Donetsk pensi que l'informacion es incorrècta, per pas dire falsa. I aguèt pas vertadièrament de boicòt (e pensi pas que i aviá pas de collègi electoral dobèrt a Donetsk, o caldriá verificar d'a fons) mas en realitat d'atacas dels collègis electorals e de raubatòris dels bulletins que fa qu'a mai se qualques collègis electorals èran dobèrts avián pas cap de bulletin per far votar.
Aital ditz lo KyivPost: "Eastern Ukrainian Luhansk and Donetsk oblasts made a sharp contrast with the rest of the country. Most polling stations failed to open for the vote because of intimidation and attacks by separatist gangs who pledged they would not allow a national election in that part of the country, where two independent republics were proclaimed earlier this month."
Cal notar pr'aquò que dins tota la region de Donetsk (pensi) aguèron aperaquí un 15% de participacion, çò qu'es pas marrit finalament dins un endrech ont lo fach de votar te pòt portar de còps e benlèu te far pèrdre la vida...
Do pobachennja!
Estonant que lei país coma Grècia, Portugau, Espanha ò Irlàndia ò Itàlia, que patiguèron lo mai d'aquesta famosa crisi son pas lei país que mandèron lo mai de deputas ultra-drechistas.
Au còntra, Danemarc, França, Reiaume-Unit, elei, se ne'n privèron pas.
Dire que la votacion FN ò mai generalament ultradrechista es una votacion de crisi es messorguier. Es una votacion conscientizada de populacion egoïstas, e per lo cas de França, d'una populacion que viu dins una mitologia completament deliranta.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari