Las riòtas se repetisson dempuèi diluns a Barcelona, en seguida del deslotjament e de la demolicion de Can Vies, un esqüat que dempuèi dètz e sèt ans aculhissiá las còlas culturalas, creativas e politicas del quartièr e que quitament aviá 135 ans d’istòria coma sit sindical de luchas socialas. Fasiá qualques jorns que la municipalitat e los esqüataires avián suspesas las negociacions.
 
Diluns, a l’ora que la polícia anèt deslotjar l’ostal, aperaquí 4000 personas s’acampèron près del sit en recebent los ocupants que sortissián amb d’aplaudiments e d’abraçadas. S’agissiá de vesins del quartièr, e de simpatizants de l’esqüat d’un pauc de pertot. Qualques oras puèi, una manifestacion de protèsta s’acabèt amb de fòrtas susmautas entre manifestants e policièrs, qu’ataquèron quitament la redaccion d’un jornal alternatiu.
 
An criticat aquel deslotjament la Federacion de las Associacions de Vesins de Barcelona, e mai los partits politics Iniciativa-Verds (ICV), Esquèrra Republicana de Catalonha (ÈRC) e la Candidatura d’Unitat Populara (CUP).
 
Aquesta nuèch las susmautas se son tornadas debanar a la capitala catalana. Los incidents comencèron après que cremèron la grua que fasiá la demolicion de la bastissa. La polícia carguèt del temps que de barricadas apareissián per tot lo quartièr. Las protèstas son arribadas a d’autres quartièrs de la vila e quitament a d’autras vilas.
 
Lo cònsol de Barcelona manifestèt sa volontat de dialòg e critiquèt las violéncias, mas lo mond se mòstran fòrt indignats ara que la bastissa es ja deslotjada e la demolicion facha.
 
Can Vies èra una construccion qu’aperteniá a la societat del transpòrt public de Barcelona (TMB). Fins ara aviá ganhat totes los jutjaments per la deslotjar pr’amor que legalament lo sindicat CNT aviá drech de l’emplegar, e aquel sindicat èra d’acòrdi amb los ocupants. La municipalitat aviá ensajat mai d’un còp de deslotjar e demolir l’ostal per i bastir d’abitanças privadas e fin finala reüssiguèt en allegant l’estat marrit del bastiment.
 
L’ostal èra lo sèti social de mai d’un collectiu de jornalisme alternatiu, de grops politics d’esquèrra, de còlas de danças tradicionalas, de grops culturals, d’associacions de cinèma… S’i fasiá de fèstas alternativas, de talhièrs de teatre, de conferéncias e debats, de teatre, de cinèma, de concèrts, de presentacions de libres, de repaisses populars e d’autras activitats.



Tuits sobre "#CanViesNoEsToca"