A compdar deth 1r de junh se met en foncionament era carta multiviatge ALSA entre era Val d’Aran e Lhèida. Eth viatgèr qu’age era carta gaudirà d’un important estauviament de 50% per trajècte.

Era Direccion Generau des Transpòrts e dera Mobilitat dera Generalitat de Catalonha, laguens des politiques de reequilibri territoriau, e en cas d’Aran, ara demanda deth Conselh Generau d’Aran, met en marcha ua naua carta multiviatges en trajècte: Val d’Aran-Lhèida.
 
Segons era conselhèra aranesa deth Torisme, deth Comèrç e deth Consum, Anna Díaz, “eth govèrn deth Conselh Generau d’Aran cercaue, coma prumèr objectiu, eth poder de desencarir eth còst des estudiants aranesi que corsen es sòns estudis en Lhèida.”
 
Eth prètz dera carta qu’ei de 80 èuros e que permeterà realizar eth trajècte entre era vila catalana e era Val d’Aran per sonque 8 èuros. Era validitat deth títol ei de 120 dies.
 
Aquera carta s’ahig ara ja existenta entre era Val d’Aran e Barcelona que ja ei en foncionament jos es madeishi critèris e ath prètz de 165 èuros. Eth prètz deth viatge tà Barcelona dera Val d’Aran ei de 33 èuros se s’aquerís un bilhet simple, e de 16,50 èuros entad aqueres persones qu’aquerisquen era carta T10/120.
 
Eth títol de transpòrt T10/120 ei multipersonau e pòt èster utilizat pes membres d’ua madeisha familha o per un grop d’usatgèrs entà hèr es sòns desplaçaments amassa. Aqueth títol de transpòrt utilize era tecnologia de validacion sense contacte, se pòt recargar a bòrd des quites veïculs e pòt èster aquerit enes estacions d’autobusi de Lhèida, Barcelona Nòrd e enes burèus dera societat Alsa en Vielha.
 
Er establiment dera carta cèrque melhorar era competitivitat deth transpòrt public, en tot supausar un important estauviament enes viatges. Aqueres mesures visen promòir er usatge deth transpòrt public enes comunicacions entre era Val d’Aran e es principaus viles catalanes, en tot dotar as viatgèrs d’un hilat eficient a prètzi atractius que contribuisque a esténer er usatge.
 
Ei previst un transpòrt public tà Tolosa.
 
 
 
 
CGA/FM