Dimècres passat, Google presentèt sa veitura autonòma que circula sens menaire. Fins ara Google aviá adaptat de veituras convencionalas per far d’assages, mas ara, per contra, a ja presentat un modèl sens volant ni pedalas que circula solament de faiçon autonòma.
 
Lo director del projècte, Chris Urmson, a assegurat que los veïculs “auràn pas de volant, ni d’accelerador, ni de pedalas, ni de frens perque n’auràn pas de besonh”. “Lo nòstre logicial e los sensors s’encargaràn de tot lo trabalh”, çò apondèt. Se tracta de veïculs “basics mas que te pòrtan ont vòlgas solament en quichant un boton”.
 
Lo prototipe presentat pel gigant tecnologic es electric, a dos sètis, es petit, fòrça compacte e a una aparéncia futurista. Lo veïcul se contrarotlarà mejançant una aplicacion per telefòn mobil que l’usatgièr i deurà solament seleccionar la destinacion finala. En mai d’aquò i aurà dos botons, un per lo metre en marcha e un per estancar la veitura en cas d’emergéncia.
 
Google, qu’assegura qu’a priorizat sustot la seguretat, vol construire un centenat de veituras per començar de las assajar aqueste estiu que ven. Se “tot va plan” la societat a idèa de menar a tèrme un programa pilòt en Califòrna dins los ans que venon.