Lo professor de segondària de lenga catalana en Malhòrca, Jaume Sastre, a ja complit sa tresena setmana de cauma de la fam, en metent sa vida en mans del president balear José Ramón Bauzá. Es son accion de protèsta frapanta contra la politica educativa del govèrn autonomic de las Illas Balearas (del Partit Popular), que s’entestardís a mespresar las revendicacions dels ensenhaires e dels parents e, e mai, qu’impausa un decret discriminant lo catalan dins las escòlas. Sastre comença de se sentir aflaquit mas manten l’esperit fòrt coma lo primièr jorn. “Es benlèu lo qu’a mai de vam de totes”, çò ditz lo musician e èx-professor Biel Majoral, que li fa de pòrtavotz tant que Sastre pòt pas mai aculhir los mèdias a causa de son estat de santat.
 
Jaume Sastre se passeja un pauc de matin, recep de mens en mens de vesitas e, de ser, ven far una analisi completa de sang per contrarotlar l’evolucion de sa santat. Fa vint e tres jorns que comencèt la cauma de la fam e es determinat a ne far almens trenta. D’ara enlà, s’intra dins una fasa mai grèva, e se lo govèrn balear a pas fach cap de pas, discutiràn cossí contunhar la protèsta. “Es un luchaire de tria”, çò ditz Majoral a Vilaweb, que soslinha la granda quantitat de mond que l’encoratjan e la granda còla que lo sostenon.
 
“Va far los trenta jorns de cauma, aquò’s segur. Esperam que lo govèrn faga qualque movement, mas avètz ja vist çò que ditz Bauzá. Sembla que lo PP aja pas perdut cap de vòte”, çò explica, en tot far referéncia a las declaracions del president balear, que defendiá lo mantenement de sas politicas. Sembla, doncas, que Bauzá a pas cap d’intencion de se sèire per parlar amb los regents. Mas Sastre, sa còla de sosten e, en general l’Assemblada dels Ensenhaires son fisançoses qu’arribarà lo moment que Bauzá los deurà escotar e lor parlar.
 
Jaume Sastre, dins sos 55 ans, a pas encara recebut cap de vesita ni cap de telefonada del govèrn, mas si que n’a recebut de politicians del PP a títol individual e lèu d’un centenat de personas, de centres educatius e d’associacions qu’an aderit a la siá causa. “Aquò l’encoratja fòrça, e ditz que contunharà tant que lo govèrn farà pas cap de pas. Se Bauzá es conscient de çò que vòl dire una cauma de la fam, sustot amb tot lo movement que i a darrièr, cresi pas que pòsca barrar los uèlhs”, çò ditz Biel Majoral.
 
 
De sostens de pertot e de totas las colors politicas
 
Los sostens a Sastre arriban de pertot e de gents de totas las colors politicas, dont tres èx-presidents del govèrn. Dimècres passat lo deputat d’ÈRC Alfred Bosch expausèt l’afar dins lo parlament espanhòl. Lo sosten s’estend tanben sul ret, siá a travèrs de la campanha d’autofòtos promoguda per Help Catalonia, siá amb de messatges sus la pagina de Facebook, sul sieu blòg o sus Twitter. Al delà, an mes un libre de vesitas dins son ostal en Malhòrca per daissar testimoniatge del sosten e de la solidaritat. Qual o vòlga far personalament tanben pòt anar fins a l’Ostal Long de Palma, al costat de Son n’Espasas, ont i a un libre de vesitas per daissar testimoniatge del sosten e de la solidaritat.
 
La cauma de la fam es “una reaccion contra las agressions, lo maltractament e las vexacions”, çò dison los responsables de la campanha de sosten a Sastre. E apondon: “L’educacion es estada sequestrada per un govèrn qu’agís de faiçon unilaterala e temerària. Après dos ans, la cauma de la fam es una responsa al desprestigi, als dorsièrs punitius, a las imposicions, als atacs contra la lenga, a las retalhadas e al foment de l’escarniment contra l’escòla publica en catalan”.