Lo 30 de mai de 1814, uèi fa 200 ans, se signèt lo Tractat de París que liberava la Comtat de Niça de 22 ans d’ocupacion francesa, mas que i sometiá lo Comtat Venaicin. Amb aquel tractat se metiá fin a la guèrra entre França e la Seisena Coalicion formada pel Reialme Unit, Russia, Àustria, Suècia, Portugal e Russia. Los eròis d’aquela liberacion foguèron los barbets, los resistents de las montanhas que luchèron contra l’ocupacion francesa pendent aquelas 22 annadas. Niça anava far partida del nòu Reialme de Sardenha-Piemont. Mas qualques decennis pus tard, Sardenha-Piemont, per d’estratagèmas politics, liurèt lo País Niçard a França; e aital França annexèt aquela partida d’Occitània amb un referendum fraudulós en 1860 e encara l’ocupa uèi.
 
 
Conferéncia a Niça
 
Per remembrar aqueles eveniments se fa uèi una conferéncia sus La Liberacion de la Comtat de Niça, a 18h, a l’auditòri de la BPCA a L’Arenàs. L’entrada e lo pargatge son liures. Mena a tèrme aquel eveniment l’associacion Raïç dau País Niçard, amb lo sosten de las associacions Niçard per Totjorn, Centre Cultural Occitan País Niçard e Alpenc, Viure au País, Siam d’Aquí, Parlem Òc-Bi País Niçard e Comtat, Federacion de las Associacions de la Comtat de Niça.
 
 
Omenatge als barbets
 
L’associacion Raïç dau País Niçard a tanplan lançat una soscripcion per poder realizar una placa commemorativa en onor dels barbets. Totas las associacions mençonadas acampan de chècs a partir de 5 èuros.
 
 
A Coarasa
 
A l’ocasion d’aquel bicentenari, lo cors de coarasièr d’aqueste dissabte serà consagrat a la memòria d’aquel fach istoric. Lo Centre Cultural Occitan País Niçard e Alpenc organiza una conferéncia, en occitan, a Coarasa, ont Cristòu Daurore farà descobrir aquel periòde pauc conegut. L’eveniment aurà luòc a 15h a l’anciana escòla, sus la Plaça Fèlix Jordan.
 
Lo cors es limitat a 20 personas e la participacion es de 4 èuros per cors. Entresenhas per telefòn al +33 (0)6 71 18 61 21 o sul sit www.coarasa.fr.