Rodés ten ara son Musèu Solatges
 
Lo Musèu Solatges es inaugurat. Lo pintor roergàs, qu’èra present dins 90 musèus del Mond, a ara un musèu consagrat a son art dins son Rodés natal. Ièr l’inaugurèt lo president francés, François Hollande, e lo president de Catalonha, Artur Mas. A partir de uèi se pòt ja vesitar.
 
Solatges es fòrça conegut per l’usatge dels rebats d’una color negra qu’el nomena negre-lutz o otranegre; a ja realizat mai de 1500 tablèus e es un dels principals representants de la pintura informala. Lo musèu aculhís las òbras del pintor occitan que, dins sos 95 ans, a fach una donacion de mai de 500 pèças.
 
Lo musèu, dins un jardin al versant del puèg de Rodés, en plen centre vila, a 5000 mètres cairats, dont 2500 son per las colleccions, 1470 per las colleccions permamentas e 500 per las exposicions temporàrias. Lo musèu qu’aculhís tanben d’activitats pels enfants e un restaurant gastronomic menat pels fraires Bras.
 
 
 
Lo cònsol de Rodés planh “l’abséncia totala” d’ajuda de l’estat
 
Lo cònsol de Rodés, Christian Teyssèdre (PS), planguèt dijòus passat “l’abséncia totala” d’ajuda de l’estat, segon d’informacions de Midi Libre, e mai se lo Musèu Solatges, inaugurat per Hollande, es labelizat “musèu de França”. “L’estat dona pas un centim pel foncionament dels tres nòus musèus de la nòstra vila pels quals s’es acordat lo labèl «musèus de França»”, çò diguèt.
 
Dins aquel sens, Teyssèdre parlèt d’“inegalitats territorialas”. “Aicí, a Rodés, los «musèus de França» son finançats a 100% pel contribuent local, del temps qu’aqueles qu’an aqueste estatut a París son finançats per l’estat”, çò diguèt lo cònsol, en fasent referéncia a las despensas de foncionament dels musèus.
 
L’elegit avertiguèt que ne parlariá amb lo president francés. “Dirai a François Hollande que volèm ben participar a l’esfòrç de redreiçament nacional mas qu’una tala baissa d’un còp, aquò es tròp! Las despensas de personal aumentan e las espèras son importantas perque i a una aumentacion de la pauretat e de la precarietat”.
 
Lo Musèu Solatges a costat 25 milions d’èuros, finançats principalament per la comunautat d’aglomeracion del Grand Rodés. L’estat a portat 4 milions, coma la region de Miègjorn-Pirenèus, e lo departament d’Avairon a donat 2 milions. Lo còst de foncionament es estimat a 1,2 milion d’èuros per an e se compta pas qu’amb la comuna de Rodés, segon Teyssèdre.
 
Un conselhièr municipal de Rodés, Jean-Louis Chauzy (PS), president del conselh economic, social e environamental regional, a cridat a “crear una vertadièra solidaritat entre las collectivitats” per daissar pas lo Grand Rodés pagar tot sol la factura de foncionament del Musèu Solatges.

fffff		fffff
	De païsans sindicalistas sequèstran un conselhièr presidencial   En marge de l’inauguracion del Musèu Solatges, de sindicalistas de la Confederacion Païsana sequestrèron un conselhièr en agricultura del president Hollande: lo tenguèron blocat pendent qualques oras dins la prefectura de Rodés. Aital volguèron marcar lor solidaritat amb d’autres militants de la Confederacion Païsana, en Picardia aqueles, que son enseguits per aver deteriorat lo chantièr de la “bòrda de las mila vacas”, un projècte controvertit d’elevatge industrial.