Tres ans après lor maridatge, los princes de Mónegue, Albèrt II e Charlena, an anonciat, per mejan d’un comunicat de premsa, qu’espèran lor primièr enfant. Aquesta nòva l’esperavan fòrça dins la familha princièra. L’enfant que naisserà, que sabèm pas encara qual serà son sèxe, serà lor primièr en la linha de succession, carga que teniá fins a l’ora d’ara la princessa Carolina, sòr del sobeiran. Lo petit Grimaldi naisserà a la fin de l’annada.
 
E mai se lo prince Albèrt a ja dos enfants illegitims, fruches de relacions precedentas, lo qu’es a mand de nàisser serà lo primièr filh del parelh monegasc dempuèi lor maridatge en julhet de 2011.
 
Aquela nòva met fin a las rumors de desavenenças del parelh o de la dificultat de l’èx-nadaira sud-africana per s’adaptar a la vida del principat e a sa bèlafamilha. “Creo que m’a chaugut un pauc de temps per m’installar e m’adaptar. Me chal pas quichar. Arribarà quora deurà arribar”, çò soslinhèt la princessa sus son eventuala maternitat, dins una entrevista al començament de mai al Sunday World. Charlena, dins sos 36 ans, disiá en aquela entrevista qu’ela s’èra centrada sus son prètzfach dins sa fondacion umanitària, mas que se sentissiá ja preparada per èsser maire.
 
Las nòças d’Albèrt de Mónegue e Charlena se debanèron en julhet de 2011, en una ceremònia religiosa e una autra de civila, après una relacion de cinc ans. Lo parelh s’èran coneguts l’an 2000, quand Albèrt presidiguèt una competicion de natacion que Charlena i participava coma esportiva.