Se joguèt ièr lei primierei partidas d’aquela Copa dau Mond de la CONIFA, federacion de fotbòl que recampa diferents país que son pas reconeguts per la FIFA. Après la desfacha suspresa dei curds còntra leis aramèus, Occitània afrontèt per lo primier còp Abcazia, una republica de Caucàs que s’autoproclamèt independenta de Georgia en 1992 (es amusant de notar d’alhors que pendent aquela partida ièr, lo president d’Abcazia anoncièt sa demission).
 
Lo començament de partida foguèt complicat per leis occitans que tardèron a intrar dins lo match, bensai susprés per lo bòn nivèu tecnic de la còla caucasenca. Amb la nerviositat dei dos costats, lei fautas s’amolonèron e l’arbitre donèt dos cartons jaunes ais abcaz, un per una gròssa fauta sus lo numèro 17 occitan, Nabil Moussi.
Pauc d’ocasions francas dins aqueu primier periòde, a despart d’un bòn desbordament seguit d’una frapa de la part de Pierre Bru, ben arrestat per lo gardian abcaz.
 
De retorn dau vestiari, leis occitans se mostrèron mai dangierós e a la 67a minuta, Brice Martinez intrat en jòc quauquei minutas abans, recebèt lo balon d’una granda dobertura e concretizèt remirablament son accion, donant l’avantatge ai roges e jaunes.
 
Mai Abcazia dominèt la seguida dau match. Solament cinc minutas après, lo defensor Jérôme Hernandez butassèt son adversari e l’arbitre siblèt penalty. Fauguèt un esplech de Romain Ellien per gardar l’avantatge un pauc mai, mai lo gardian occitan poguèt ren faire quand lo malaürós Jérôme Hernandez manquèt sa tèsta en volent desgatjar la bala e marquèt dins sa pròpria gàbia, un gòl còntra son camp concedit a mens de dètz minutas de la fin de la partida.
 
Segur, aqueleis occitans esperavan mai d’un ponch per aqueu primier match de pola, mai que mai perque rescontraràn dins dos jorns la còla locala d’aquela Copa dau Mond, Lapònia, qu’es compausada d’una bòna partida de jogaires professionaus. En cas de desfacha d’Occitània e Abcazia fàcia ai lapons, la qualificacion se deuriá jogar a la diferéncia de gòl puei que son lei dos primiers de cada pola de tres que son qualificats per la seguida de la competicion.
 
Tot es encara possible doncas, podètz seguir en dirècte lo rescòntre venent de l’AÒF, dimars, sus lo sit de la CONIFA.




Matieu Casanòva