Vaquí un roman policièir a legir sus la plaja! 2011, Paul, un irlandés que foguèt legionari, es a miserejar a París. Un jorn, tròba un jornal dins la boita de las letras. Un Irish News de 1971. Dedins, un article que conta lo murtre de son fraire, un republican sòci de l’IRA, a Belfast dau temps daus “trebols”. I es escrita una adreiça en marge de l’article: la tomba d’un eròi republican irlandés dins lo cementèri de Montmartre. Anarà au luòc dit e trobarà una... puta de luxe e lo sieu destin. Vaquí lo paure irlandés embarcat, amb la sieuna nòva amigueta, dins una istòria amb fòrça desvolopaments e tracanards. Policièirs poirits, traïsons, assassinats, per còp d’astre rescontraràn... dos bretons que los tiran dau marrit pas. Mas per quant de temps? D’escadrons de la mòrt los cèrchan. Los dos fugitius trobaràn refugi dins... un luòc inatendut (e fòrça breton!) gràcias a un ancian de l’ARB (Armada Revolucionària Bretona).
 
David Le Yaouang a ben bastit la sieuna intriga amb de reviscoladas, de suspens... L’istòria es corteta (184 paginas) mas es mai ritmada coma aquò. Opération Revival 946 es un roman policièir mai que bon per l’estiu! Sus una plaja occitana o bretona!
 
 
 
 
Fabien Lécuyer