Dison las rumors, que fa de meses que duran, que i a de contactes discrets entre la Liga de Fotbòl Professional de França e lo Club de Fotbòl de Barcelona (lo Barça), per una eventuala incorporacion del Barça après l’independéncia de Catalonha. E ara, la revista Interviú n’a publicat un reportatge. Segon aquela revista, es lo club esportiu catalan que s’es interessat de jogar amb las esquipas del nòrd.
 
Aital lo Barça poiriá competir amb las esquipas del país coma Mónegue, l’Olimpic de Marselha o los Girondins de Bordèu.
 
Pasmens, coma ben o remembra Vilaweb, lo reportage d’Interviú es pagant, e solament dins la version pels abonats se pòt legir la referéncia als possibles contactes entre l’esquipa barcelonesa de fotbòl e la liga de l’estat francés. Cal remembrar, atanben, que lo president del conselh directiu del club catalan, Sandro Rossell, se declarèt radicalament opausat a aquela possibilitat, tant que preferís que lo Barça jògue dins la liga espanhòla, e mai après l’independéncia.