Dempuèi ièr, lo G7 s’amassa a Brussèlas per estudiar la situacion d’Ucraïna, sens la preséncia de Vladimir Putin, president de Russia. L’amassada dels caps d’estat e de govèrn dels sèt païses mai industrializats del Mond examinarà la seguida de las eleccions presidencialas ucraïnesas, que se faguèron lo 25 de mai.
 
An debatut sus l’economia e lo comèrci internacional, la seguretat energetica e lo cambiament climatic. La reünion comencèt abans ièr de ser amb un sopar de trabalh dels caps dels Estats Units, Canadà, Alemanha, lo Reialme Unit, França e Japon, en mai dels presidents de la Comission Europèa e lo Conselh Europèu, coma aculheires.
 
 
Exclusion de Russia
 
En març s’acordèron per exclure Russia amb lo pretèxt de l’annexion de Crimèa. Ça que la, de mèdias alternatius asseguran que tot aquel conflicte ucraïnés es fruch d’una granda manòbra occidentala per prene a Russia son enòrme poder energetic, mai que mai lo del gas.
 
Herman Van Rompuy, lo president del Conselh Europèu, diguèt que l’exclusion de Russia d’aquelas reünions èra pas permanenta, mas qu’aquela question èra encara prematurada. Sus la possibilitat d’aprovar mai de sancions contra Putin e lo sieu entorn, se limitèt a dire que s’aplicariá solament se lo Cremlin cambiava pas d’actitud quant a Ucraïna: “I a de possibilitats de resòlver la crisi” per la via diplomatica e politica, çò apondèt. Anoncièt atanben que la segonda partida de l’acòrdi d’associacion entre l’UE e Ucraïna se signariá abans la reünion de caps d’estat e de govèrn que se debanarà los 26 e 27 d’aqueste mes de junh.
 
La crisi d’Ucraïna absorbirà una bona partida de la reünion, mas tanben es previst que se parle de Siria e de mai de questions de politica internacionala. Es lo primièr còp que Brussèlas aculhís una reünion del G7.