Fa mai de 20 ans qu’existís l’Estivada, e que creis en notorietat... mas la coneissètz de verai? “Festenal” quora aquel efemèr modèl cultural es questionat, “interregional” dins un contèxt de recomposicion territoriala, estacat a las “culturas occitanas” mentre qu’una part bèla de la populacion encara sap pas çò qu’es, ni a qué correspond exactament... O auretz comprés: nos es necessari, coma a d’autres festenals, de nos tornar botar en question, sens relambi, per avançar en evolucionant, e evolucionar en avançant.
 
Per nosautres, lo contèxt es plan particular ongan: tornam tot just d’un luòc que nos aculhiguèt tres ans aderren, que permetèt de nos far conéisser largament e nos causèt tanplan qualques pensaments l’an passat, per tornar prèp d’un luòc que nos èra familiar e que devèm uèi tornar aprene de conéisser, al mitan d’autres pichons cambiaments, qu’auretz segurament pogut veire aquí o alai. Brèu, nos pausam de questions, amb l’objectiu d’una restructuracion de l’aparelh Estivada, que deurà sens dobte, se vòl subreviure e s’espandir, cambiar de forma, modificar sas percepcions, sas reflexions.
 
Mas aqueste encaminament lo volèm pas far solets, e lo farem pas solets. Perque l’Estivada aperten pas als qualques unes que, materialament, la fan, aperten a totes, totes los rodaneses, totes los avaironeses, totes los occitans curioses o revendicats, a totes aqueles que, d’aquí o d’alhors, s’i sentisson un estacament particular per çò que i venguèron, e mai i venon encara.
 
Volèm qu’aqueste festenal, qu’es lo vòstre, vos apertenga encara mai, que cadun pòsca participar, pèira per pèira, a sa construccion, a sa reflexion e a son succès.
 
Per participar, e doncas s’implicar, cal aver totes los elements de compreneson. Çò que vos perpausam, es un exercici inedit per l’Estivada: una fasa de dialòg e d’informacion, en collaboracion amb lo Jornalet, suls secrets de l’Estivada, sus çò qu’avèm benlèu jamai dich, çò qu’avèm pas pro dich, e globalament tot çò que vos agradariá d’aprene e de saber sus l’Estivada.
 
Cossí fonciona? Cossí fasèm tala o tala causida? Quals son nòstres rapòrts amb los unes e los autres? Nòstra percepcion de la lenga, de la cultura occitana e de las autras culturas? Nòstra vida sul terren avaironés? Qualas son nòstras constrenchas, nòstras dificultats? O mai basicament: qual, qué, cossí, perqué?
 
Pausatz-nos vòstras questions, prigondas o pragmaticas, anonciatz-nos vòstras observacions, vòstras reflexions, qualas que sián, liurament, sens constrenchas, net e clar, aicí, en comentaris.
 
Serem atentius a cada ponch que nos serà prepausat, recamparem las questions e i respondrem d’un sol còp, dins un article jos la forma d’un question-responsa dins lo Jornalet, liurament tanben, sens lenga de fusta e en tota transparéncia, d’aquí doas a tres setmanas.
 
Ajatz pas paur, i a pas de marrida question, sonque una manca d’informacion!
 
Espectators, artistas, partenaris, benevòls, curioses, militants, estivadièrs de totjorn o de gaire... ven a vosautres de jogar!
 
 
 
 
La còla de l’Estivada